منى فاروق: كله كان بيدوس عليا لأن معنديش ضهر ومبقاش عندي صحاب

تحدثت الفنانة منى فاروق عن أزمتها الأخيرة، وكشفت بعض الأمور في حياتها الشخصية، كما تحدثت منى عن والدها الراحل وكشفت عن علاقتها به.

تحيا مصر يرصد لكم تصريحات منى فاروق

وقالت منى فاروق لموقع تحيا مصر: لما حصلي أزمة زي اي بني أدم في الدنيا ممكن يتعرض لأزمة بس الناس كلها مسمتش عليا واللي معاه سكينة بيدبحك واي حد بيدوس عليا لأن أنا معنديش ضهر بس ربنا ضهري

منى فاروق: مبقاش عندي صحاب ولما ربنا ابتلاني الناس ظهرت على حقيقتها

وكشفت: ربنا ابتلاني وناس كتير قدامي ظهرت على حقيقتها سواء من صحابي أو ناس قريبة مني أو من الشغل ومبقاش ليا صحاب دلوقتي وفي ناس ربنا كرمني بيهم بعد الأزمات اللي حصلتلي

منى فاروق: بحاول أهرب من الواقع لأن الحياة بتوجع

وتابعت منى فاروق: بحاول أهرب من الواقع اني مفكرش فيه عشان الحياة بتوجع والحقيقة دايمًا بتوجع و أبويا لو كان عايش كان هيجيبلي حقي ومكنتش هحارب الدنيا لوحدي.

 واستكملت منى: أبويا لو كان موجود كان هيجيبلي حقي من الدنيا كلها ومكنش هيخلي حد يزعلني وكان هيخليني واثقه من نفسي ومكنش هيخليني اتعرض لأزمات نفسية ومكنتش هحارب مع الدنيا لوحدي.

منى فاروق: أبويا مات وهو راضي عني ومكنش معترض على التمثيل

وكشفت منى فاروف: الناس طلعت أن أبويا مات غضبان عليا وده محصلش أبويا مات راضي عني وبيحبني ومكنش معترض على التمثيل ولا كان في مشاكل بينا وانا مسبتهوش و كانت روحي فيه وهو اتوفى قبل الأزمة بسنين والأزمة كانت في 2019 وأبويا اتوفى  2016.

كما وجهت منى فاروق نصائح للبنات وقالت: متثقيش في أي حد أوي، ومتحبيش أوي وفكري في قراراتك كويس

منى فاروق توجه رسالة لجمهورها

ووجهت الفنانة منى فاروق رسالة لجمهورها وقالت: استنوني قريب جدًا على الشاشة وأنا نا آسفة وأنتوا وحشتوني أوي واحكموا عليا من خلال أعمالي الفنية ومن خلال الشاشة ومحتاجة دعموكوا ليا الفترة اللي جاية.

وتابعت:أنا بشتغل بره مصر وبشتغل في لبنان ودبي بس أنا عايزة اشتغل في بلدي مصر وملهاش علاقة بالماديات، أنا عايزة أخدم بلدي وعايزة أرجع أعمل أدوار تاني في مصر أنا بحب بلدي وبحب شعبها ورئيسها ونفسي ابقى موجودة.