منى فاروق: بقالي ٤ سنين متعايشة مع الإبتلاء.. وهفضل احاول أقف على رجلي تاني

كشفت الفنانة منى فاروق عن محاولاتها الدائمة للخروج من أزمتها الأخيرة بعد مرور 4 سنوات عليها، وذلك خلال لقائها في استوديو تحيا مصر. 

منى فاروق: بحاول اقف على رجلي 

وقالت منى فاروق لـ تحيا مصر: بحاول لحد النهارده اخرج من الإبتلاء، وبقالي ٤ سنين متعايشة معاه، وبحاول اتعافى وابقى موجودة، والحاجات مع السنين بتمر وبتتنسي، وبحاول ارجع اشتغل وانجح واقف على رجلي، وهفضل احاول. 

كما كشفت الفنانة العديد من التفاصيل على أزمتها الأخيرة، كما وجهت رسالة لمنتقديها، قائلة: انا يا جماعة عايزة انجح، احكموا عليا من شغلي والشاشة، متحكموش عليا من حياتي الشخصية ومتظلمونيش، ومستاهلش الظلم عشان كلنا بنغلط وبنرجع لربنا.

منى فاروق وأزمتها الأخيرة

واستكملت منى فاروق حديثها خلال نفس اللقاء عن أزمتها الأخيرة، قائلة: هي ابتلاء كبير واللي ربنا بيحبه بيبتليه، وقولت اني كان في جواز في الفترة دي، بس أنا اتعرضت لظلم كبير وجلد وناس جرحت فيا وفي أهلي، وحكموا عليا بالإعدام وأنا على وش الدنيا، وحسبي الله ونعم الوكيل في كل إنسان ظلمني.

وتابعت: لما بشتغل بتبقى كل حاجة تمام، واللي مخليني مبشتغلش الابتلاء اللي اتعرضلته وحسيت إني منبوذة وده أثر فيا جدًا، وتعبت نفسيًا إني بعافر مع الدنيا، وربنا بيقويني إني اشتغل وعايزة اقف على رجلي.

منى فاروق: عايزة اشتغل في بلدي مصر 

كما قالت منى فاوق: أنا بشتغل بره مصر وبشتغل في لبنان ودبي بس أنا عايزة اشتغل في بلدي مصر وملهاش علاقة بالماديات.

وتابعت:أنا عايزة أخدم بلدي وعايزة أرجع أعمل أدوار تاني في مصر أنا بحب بلدي وبحب شعبها ورئيسها ونفسي ابقى موجودة.

وكشفت منى أنه أذا عُرض عليها عمل بمقابل مادي قليل ستوافق عليه قائلة: هعمله عشان هرجع احسن من الأول والمشوار مش بيطلع مرة واحده لا هرجع واحده واحدة وأنا رجعت شوية وهحاول مضايقش نفسي واتقبل الدور لأني يمكن مش شايفة مقامي فيه بس دلوقتي هوافق اعمله عشان بعدين يبقى في الاحسن.

وتابعت منى فاروق: أنا بحب الشغل نفسه وبحب التصوير وأنا مش بشحت حاجة من حد واللي شايفني موهوبة وشاطرة فنيًا ياريت تشغلني.