لو حد داسلي على طرف مبعرفش اسكت ولسة متأثرة بوفاة والدي.. أبرز تصريحات يسرا اللوزي

حلت الفنانة يسرا اللوزي ضيفة على برنامج “اللية مع قصواء”، الذي تقدمه الإعلامية قصواء الخولي على شاشة قناة cbc، والتي فجرت خلاله مجموعة من التصريحات عن حياتها الشخصية، يرصدها تحيا مصر في ذلك التقرير.

يسرا اللوزي عن وفاة والدها: لسة متعافتش وبتماسك شهور وأرجع أنهار تاني

تحدث يسرى اللوزي عن وفاة والدها، فقالت: الموضوع كان فجأة مصدقتش وحتى لما والدتي اتصلت وقالتلي الخبر، قولتلها أنتي بتهزري، بحاول أقنع نفسي أن دي الحياة، وبحس كان ممكن أقضي وقت أطول معاه وأن لسه في حاجات متحكتش.

وأضافت: لسه متعافتش ومعتقدتش أن في حد بيتعافى بس بنمر بمراحل من التقبل، بتيجي لحظات بننكر ونغضب ونعيط ولما بفتكر الموضوع بقول أنه محصلش، بتماسك شهور وبرجع أنهار اتكلمت مع ناس وقالولي أن عمر ما بنرجع زي الأول بنتعود ونتأقلم ومش غلط أن اتكسر في لحظة، وأنا مش متخيلة أن الحزن دا عمره ما هيمشي.

يسرا اللوزي: اتنمروا على بنتي والجمهور رد بدالي

وتطرقت يسرا اللوزي بحديثها عن التنمر الذي لاحق ابنتها من أحد متابعيها على السوشيال ميديا، والتي عايرتها بمرضها، فقالت: في أخر مرة قلت مش هرد، لكن نزلت  التعليق السخيف وردّ الجمهور عليه، أشكر جمهوري الحبيب.

وأوضحت يسرا اللوزي أهمية التعامل مع مشكلات الأطفال على إنها مشكلات كبيرة وحقيقية، فقالت: مينفعش إننا نقول للطفل متزعلش ولا تعيط أو تمر بلحظات صعبة، لازم نبين لهم إننا بشر، لازم الطفل يعرف إن  الضعف أمر طبيعي ممكن يتعرضله أي شخص.

يسرا اللوزي: معرضين للانتقادات طول الوقت وأما موضوع يوصل لبجاحة مبعرفش اسكت

وكشفت يسرا اللوزي عن كيفية تعاملها مع الانتقادات، فقالت: احنا متعودين على التعرض للانتقاد وأحيانا الشتيمة، في رأي أو لبسي أو أعمالي الفنية كشخصية عامة مش بتعجب كل الناس، وده أمر طبيعي، وبالتالي مينفعش أجري ورا رضا كل الناس لأن ده عمره ما هيتحقق.. والموضوع لما يوصل لبجاحة أو حد يدوس لي على طرف مبعرفش أسكت، لكن مسمحش لحد إنه يمسك عليّ غلط، بحب أحرج بالذوق والأدب وتلقيح كلام بين السطور وهسيب الجمهور يتعامل.