سيدة للقاضي: «جوزي بيسرق هدومي ويعملي بيها سحر عشان يشوفني حلوة»

جوزي طلب أيدي للجواز عشان يستفاد من مصالحه مع والدي لكن مخترنيش عن حب ... بتلك الكلمات روت زوجة لتحيا مصر من داخل محكمة الأسرة عن زوجها الذي قام بفعل شنيع في حقها وأخذ شئ من أثرها ليذهب به إلي فاعلين السحر والدجل حتي يتمكن من رؤيتها في صورة جميلة عكس حقيقتها  تجعله يتمكن من العيش معها بدون نفور . 
تحيا مصر

جوزي شغال عند والدي في مصنع ملابس 

بدأت الزوجة الحديث :" جوزي شغال عند والدي في مصنع ملابس بقاله 5 سنين أحنا وضعنا مرتاح وأي حد يعرفنا كان بيتمني تربطه بينا اي مصلحة سواء شخصية أو رسمية بسبب سمعتنا الطيبة وحالنا الميسور لكن اكتر شخص كان والدي بيرتاحله وبيثق فيه وكان بمثابة دراعه اليمين هو جوزي لأنه عرف أزاي يخدعنا وقتها ويتدعي أنه شخص طيب ومش طمعان فينا لحد ما أنا كبرت وتميت الـ20 سنة ووقتها جوزي طلب أيدي من والدي وكانت الموافقة عليه سريعة جدا وفي مدة بسيطة كنا مخطوبين وكاتبين الكتاب .

بعد الجواز هدومي كانت بتختفي وبلاقي هدوم غيرها مش بتاعتي 

وتابعت الزوجة :" بعد الجواز كانت بتحصلي حاجات غريبة وحاجات كتير من لبسي كانت بتضيع والاقي مكانها هدوم تانية مش بتاعتي وفي كل مرة كان يحصل كدة كنت اسأل جوزي " بتاعة مين الهدوم دي وأية اللي جابها هنا ؟" كان يرد عليا ويقولي " ده أكيد لبسك وأنتي اللي ناسياه " لدرجة أني كنت فعلا بشك في نفسي وأوقات تانية كنت باخد الهدوم دي واروح اوريها لأخواتي او أخوات جوزي يمكن نسيوها عندنا لكن مكنتش بتطلع بتاعة حد منهم ".

جوزي كل يوم بيشرب حاجة غريبة ولما سألت عليها طلع سحر 

واختتمت الزوجة حديثها :" جوزي فضل فترة كل يوم بيشرب حاجة غريبة شبه الأعشاب وبيخبيها في دولابه ولما شوفتها كذا مرة اتحرجت ومقدرتش اسأله عليها لأن قلبي حس أنها حاجة شبه الأسحار والأعمال لأنها لو كانت حاجة عادية كان شالها في المطبخ لحد ما خدت شوية منها بدون علمه وخبيتها في شنطتي وسألت عليها ست كبيرة جارتنا وبتفهم في القصص دي وجارتي دي دخلت جوايا شكوك غريبة ناحية جوزي وأكدتلي أنه سحر ومعمول بقاله فترة كبيرة خصوصا بعد ما حكيتلها أن في هدوم بتختفي مني وبلاقي هدوم تانية مكانها معرفهاش رجعت البيت وفضلت مستنية جوزي يرجع من الشغل عشان اتكلم معاه ولما واجهته وهددته أنه لو معترفش وقالي أية الحاجة دي وبالتالي وقتها هطلب الطلاق وبالتالي هيسيب كمان شغله مع والدي خاف وقالي " ده كان سحر خفيف ومش مؤذي عملته عشان تعجبيني وتبقي حلوة في عيني " حسيت بالكسرة وقتها واتقهرت أن جوزي اللي افتكرته بيحبني طلع مش بيشوفني جميلة وبيعملي اسحار وطبعا كل ده عشان يطيق العيشة معايا ويفضل بيستفاد من مصالحه مع والدي طلبت منه الطلاق ومرضيش يطلقني فجيت رفعت عليه دعوي خلع في محكمة الأسرة ".