بكلمات مؤثرة.. حسام داغر يحيي ذكرى وفاة والدته

حرص الفنان المصري حسام داغر على إحياء ذكرى وفاة والدته بنشره صورة لها عبر حسابه الرسمي بموقع تبادل الصور والفيديوهات القصيرة إنستجرام.

تحيا مصر يرصد إحياء حسام داغر لذكرى وفاة والدته. 

ذكرى وفاة والدة حسام داغر

وعلق داغر على الصورة قائلًا:لما شعري بدأ يطلع فيه ابيض من ٤ سنين كان الابيض بيطلع في جناب بس فوق ودني و كان شكله جديد عليا بس اوقات كنت بحتاج اصبغه و اتعودت ان والدتي هي تصبغه ليا من صبغه بتاعتها.. لان كانت فكره الصبغه جديده عليا و فضلت كده لحد ما تعبت هي و بقت صحتها متدهوره و في مره قالتلي انت سايب شعرك ضرب ابيض ليه كده و اصرت تقوم من السرير تعملي شعري و هي كانت صحتها تعبانه و مبقتش تروح كوافير بتاعها و شعرها كله ابيض برضه قلتلها بعد ما صبغتلي اقعدي انا كمان هعملك شعرك ".

وتابع: و كان شعرها جميل و تقيل و هي كانت قاصاه ( الا جارسون ) قصير الي هو تلت و تلتين و كانت علطول بيه في البيت كده و ده شكلها الي انا متعود عليه مش شكلها الي اغلب الناس عارفها بيه بالحجاب .. المهم انا عملت شعرها لاول مره ساعتها و و كان شكله جميل بعدها و رجعتها سريرها تاني .. كانت اول و اخر مره اعمل ده.

وأضاف: بس سابت عندي ذكري حلوه لما كانت تضحك علي اني مش عارف اوزع الصبغه و تقولي انا معرفش ازاي سبتك نعمل ده .. كان شعرها غالي عليها و لما كنا خايفين يقع بسبب التعب تقولي لا ربنا مش هيبهدلني قي اخر عمري و كانت عندها ثقه في ده .امبارح كنت حضرت حفلة لعازفة الهارب منال محي الدين لقيتها عامله نفس قصه الشعر بتاعتك و غصب عني دموعي خانتني.

واختتم حسام داغر حديثه قائلًا: في لما افتكرت كل ده..هي دخلت المستشفي بعدها و توفت في العنايه المركزه قدامي و مكنتش مستوعب و الدكتور بيملي الممرض يقوله المريضه توفت في تمام الساعه ١١ :٣٣ دقيقه اثر هبوط حاد في الدوره الدمويه و القلب.بيقول ده و انا باصص علي سريرها و شايفها نايمه عادي و مش مستوعب بساطه التقرير الي بيكتبوه .كانو بيكتبو بشكل روتيني و انا كل الي بفكر فيه استنوا انتوا ازاي بتكتبوا كده دي نايمه بس استنوا اعتقد انها لسه مش ميته و رحت ليها لقيت ممرضه بتفك منها الانابيب و اقولها استني شويه بتعملي ايه اديها فرصه هي هتبقي كويسه راحت الممرضه بكت و سابتني وحدي معاها .. بصيت حسيتها صاحيه قلتلها متخافيش علي اخواتي و متخافيش عليا و اشوفك علي خير و انا مش مصدق الي بقوله.. انا لما عملت العمره الاخيره ليكي كنت بدعي و بقول لربنا انا اخر مره كنت هنا هي كانت معايا في الحج و انت عارف مدي تعلقها بيك .ساعتها اتجرأت و طلبت من ربنا في الطواف ان يديني اي اشاره انك عنده في الجنه و رجعت اعتذرت في ساعتها بقوله انا اسف مش مفروض احط شروط في كلامي و فجاه لقيت حزام الي فيه موبيلي و باسبوري فك ووقع مني علي الارض مع انه صعب يفك لقيت نفسي ببكي و انا بلم الحزام و قلت معقول انت سامعني و قريب مني قوي كده و عاوز تريح قلبي انها عندك في الجنه . زي النهارده كان كل ده 💔

انضم الفنان حسام داغر لابطال مسلسل الحاج إكس لانس، الذي يخوض به الفنان محمد سعد السباق الرمضاني 2023، ويشارك بعد عدد من نجوم الكوميديا.

حسام داغر في الحاج إكس لانس

ويعد مسلسل الحاج إكس لانس من بطولة أحمد فتحى وويزو وجيهان خليل وإخراج محمود كامل، وكان قد أعلن عن مشاركة محمد سعد في السباق الرمضاني 2023، المنتج ممدوح شاهين، وذلك خلال لقاءه مع برنامج Et بالعربي، مشيرا إلى أن العمل ينتمي لنوعية الأعمال الكوميدية ذات الـ 30 حلقة.

ويشهد مسلسل الحاج إكس لانس عودة قوية للفنان محمد سعد بعد غياب دام لأكثر من 8 سنوات.

حسام داغر في حالة نشاط فني برمضان 2023

هذا ويشارك حسام داغر أيضا في بطولة مسلسل حضرة العمدة، الذي يشارك في منافسة مسلسلات رمضان 2023، وهو من بطولة روبي، محمود عبد المغنى، وفاء عامر، عمرو عبد الجليل، بسمة، أحمد بدير، حسام داغر، ادوارد، محمد محمود عبد العزيز، محمود حافظ، نهلة سلامة ومحمد الصاوى ويناقش العمل قضية المرأة في المجتمع من خلال تولي سيدة شابة منصب عمدة قريتها لتواجه كل تحديات الواقع، والعمل من تأليف إبراهيم عيسى.

وتعد أخر أعمال حسام داغر، مشاركته في مسلسل الضاحك الباكي، الذي يسرد قصة حياة نجيب الريحاني، وجسد شخصيته الفنان عمرو عبد الجليل، وشارك في بطولته أيضا الفنانة فردوس عبد الحميد.