الكاتبة رانيا كمال تنتقد: "فيزا بنك مصر في الخارج مرفوضة"
ADVERTISEMENT
انتقدت الكاتبة رانيا كمال مستوى الخدمات المقدمة من بنك مصر وكذلك البنك الاهلى المصرى عند التعامل بـ فيزا بنك مصر في الخارج فتكون مرفوضة في التعاملات، وينشر تحيا مصر الشكوى المقدمة على خدمات بنكي مصر والاهلى عند التعامل خارج حدود الدولة.
شكاوي ضد بنك مصر
نشرت الكاتبة رانيا كمال عبر صفحتها الرسمية على موقع "فيسبوك"،: "منقول عن عائشة عبدالقادر ( للأسف الشديد دي كارثة )، أنا عايزة احكى عن حاجة حصلت معايا بس فعلا حزينة على اللى بيحصل".
واستكملت: "كنت مع أسرتى فى العمرة والموقف إنى رايحة الكاشير فى مكه أدفع بالفيزا لقيته بيقولى مرفوضة! قلت يمكن بنك مصر فيه مشكلة، جربت فيزا بتاعة بابا البنك الأهلى لقيت نفس الكلام. اتضايقت وكنت مكسوفة جدا جدا قدام الناس اللى واقفه ورحت ارجع الحاجه بتاعتى بنفسى كاعتذار، ومفيش ٥ دقايق ألا والاقى أصوات ناس بتتكلم بالمصرى أن إزاى الفيزا بتاعتهم مش شغالة كلهم واتضح للجميع ان فيه كده حاجة غير محترمة ولا تليق اتعملت وبدون سابق انذار أو تنويه".
عملاء بنك مصر
وأضافت: "اللى حصل ياسادة أن فى الـ ٢٤ ساعة التالية كانت طوابير المصرين فى العمره واقفين على كل ماكينات الصرف فى محاولات يائسة لصرف أي مبلغ يجيبوا بيه اكل وشرب على الأقل".
وعلقت: "ناهيكم عن كم التريقة والشماتة من جنسيات كتير واقفه وأول مايتشاف طابور يتقال دول مصريين، وبدأ كل واحد فى كل فوج يسال و يكلم ناس أنا أعمل ايه محتاج على الاقل اللى يجيب عيش وجبنه ومش عايزه اقولكم كم اعداد المسنين اللى كانت واقفه ولا منظر ست عجوز قعدت تعيط وتقول حسبنا الله ونعم الوكيل احنا نروح فين دلوقتى وأجيب تمن المواصله للمدينة إزاى".
وأضفات: "ولا موقف الاب اللى واخد ولاده يجبلهم الغدا وهما بلبس الاحرام يعنى لسه مخلصين عمرتهم و بيدفع بالفيزا الراجل قاله مرفوضه الناس اتكلموا معاه وفهموه كان هيتجنن يا جماعة أنا لسه واصل مكة هو انا لحقت اصرف أو اشترى!؟!! قالوله لو كنت دافع تمن الفندق بالفيزا فده اتحسب تعامل خارج مصر وخلاص كده؟!!".
وأردفت : "إيه التهريج ده؟! فين حقوق الانسان ولا فين كرامة الإنسان عند أى مسئول اللى هما نفسهم اصبحوا تجار عمله وأقل موظف شغال فى بنك مسئول عمله دلوقت عملة ثروه طائله الكام شهر اللى فاتوا؟؟؟؟ بالنسبالى أول ما رجعت انا سحبت فلوسى قفلت حسابى وده اقل رد على قلة الأدب اللى بتحصل وماتبقاش فلوسى وتعبى وشقايا وحد يتحكم فيها بمنتهى قلة الأدب كده وللعلم المبلغ مش قليل، وكذلك والدى قفل حسابه".
بنكي مصر والاهلى
واختتمت: "معلش طولت عليكم بس اللى بيحصل مع المصرين زاد عن الحد وأنا بتكلم عن ناس محترمة طالعه بيت الله وتتهان بالشكل ده".
جوجل نيوز
تطبيق نبض
