مصطفي يونس فى حوار لـ تحيا مصر: صفقات الأهلي «فاشلة».. «مفيش حاجه اسمها انتماء المهم هتقبض كام »..«واللي حصل فى الزمالك أساء لمصر»

مصطفى يونس لاعب كرة قدم سابق في النادي الأهلي والمنتخب الوطني المصري، ولد في 25 ديسمبر 1953.

ويرصد تحيا مصر التفاصيل:

بدأ مصطفي يونس مشواره الكروي من خلال الانضمام إلى صفوف الناشئين بالنادي الأهلي عام 1969م، ثم لعب أول مباراة رسمية له مع الفريق الأول بالنادي موسم 72/1973 أمام الأوليمبي، وكان للمدرب المجرى “هيديكوتى” دوراً كبيراً في إصقال موهبته الرياضية.

فيما وحرص موقع «تحيا مصر» علي إدارة حوار  مع مصطفي يونس ، نجم  الأهلي ومنتخب مصر، لمعرفة رؤيته حول الأحداث الرياضية الجارية على الساحة الرياضية.

رأيك في بطولة الدوري؟

"البطولة مش هتخرج عن الأهلي  أو الزمالك، لكن في العديد من الأندية المميزة هذا الموسم مثل فيوتشر وسيراميكا يقدمون مستوي جيد".

الأقرب لحصد لقب الدوري المصري؟

"النادي الأهلي هو الأقرب هذا الموسم لحصد اللقب عن الزمالك، ولكن الأستمرارية مطلوبة".

رأيك في صفقات الأهلي الموسم الحالي؟

“ صفقات النادي الأهلي الماضية ”فاشلة" كلها باستثناء أليو ديانج، ولكن الحديثة لسة مشوفتش حاجة لما أشوف أبقي أقول".

هل الأهلي قادر علي تقديم مستوي بكأس العالم للأندية؟

"أتمني أن  الأهلي يقدم مستوي جيد بكأس العالم للأندية، والإصابات لن تأثر علي أداء الفريق، المارد الأحمر بمن حضر، وإحنا بنقيد 30 لاعب يعني من المفروض الكل يكون رقم واحد".

رأيك في أزمات نادي الإسماعيلي؟

"اللي بيحصل في نادي الإسماعيلي "مأساه" ده مش الفترة بس دي من 3 سنين علي هذا الحال، والسبب في تدهور الدراويش هو"الفساد" واللاعيبة اللي مش علي مستوي، وعدم الاعتماد علي قطاع الناشئين زي زمان، والإدارات اللي ملهاش في الكرة كل هذا ادي للحالة التي يمر بيها النادي".

عن أزمة صالح جمعة؟

"صالح جمعة "مش بيتعلم" وده شئ طبيعي، حالوا متصلحش من الأهلي هيتصلح مع الإسماعيلي".

رأيك في أزمة كهربا؟

والله يتحملها كهربا، هو أفضل من الاعيبة اللي جت النادي الأهلي، ولكن هو ضيع نفسه، النادي دفع  في صفقات فيهم  ملايين، وبعدين مستفدش منهم "بـ نكلة"، ومن أبرزهم بيرسي تاو وميكيسوني".

رأيك في الانتقادات الموجهة للأهلي بسبب " تقليده" للزمالك في موضوع الاتوبيسات؟

"كلوا كلام فاضي النادي الأهلي مش بيقلد حد هو القدوة طول عمره".

هل من الممكن أن ينضم عبدالله السعيد للزمالك؟

" والله ممكن يروح وهو شخص حر يعمل اللي عايزه".

هل كان قرار خطاء رحيل رمضان صبحي عن الأهلي؟

"كل واحد بيدور على مصلحته اللي يروح الأهلي والزمالك ده هو الاحتراف، زي ما النادي بيدور علي المصلحة كمان، رمضان صبحي من أفضل اللاعيبة اللي جت في تاريخ مصر، مفيش حاجة اسمها بطولات، والتاريخ دلوقتي" كلام فاضي" المهم هيقبض كام يأمن مستقبله و مستقبل عياله هي دي الكرة حالياً". 

"الانتماء والكلام ده خلاص راح كان علي أيامنا احنا بس دلوقتي الوضع اتغير ، اللي بيجي النادي الأهلي بيبقي  محترف، واللي بيمشي يبقي خاين، هل لما جبنا لاعيبة الاسماعلي كلهم بقوا خاينين".

رأيك في أزمة الزمالك الأخيرة؟

"السبب الحقيقي رئيس النادي، حتي لو هما فعلاً عملوا كده مكنش ينفع يطلع يقول في الإعلام، ده حدث "أساء"، لمصر كلها مش للزمالك بس ".

السبب وراء تراجع منتخب مصر؟

"ده موضوع كبير عايز نفتح العديد من الملفات، السبب هو منظومة" فاسدة".

رأيك في محمد صلاح؟

"محمد صلاح هو الأسطورة الحقيقة في الكرة المصرية، علي مستوي العالم، وعلي المحلي في لاعيبه قديمة عاملين أرقام زي حسام حسن و احمد حس والحضري".

رأيك في كولر وفيريرا؟

" المفروض هما موجودين في ناديين كبار،بس المهم الخامية اللي بيجبوها

توقعاتك لمباراة القمة بين الأهلي والزمالك؟

"أتمني فوز النادي الأهلي علي الزمالك، إذا حقق الفوز فهو ضمن تتوجه ببطولة الدوري المصري هذا العام".