خاص| وفاء سالم: التمثيل انتهى بالنسبالي وعندي توجه وهدف جديد

كشفت وفاء سالم أنها لم تقوم بإجراء عملية التجميل من أجل العودة للتمثيل، كما كشفت وفاء أنها لن تعود للتمثيل مرة أخرى.
تحيا مصر يرصد لكم تصريحات وفاء سالم

وقالت وفاء سالم في تصريح خاص لموقع تحيا مصر: بعد ما عملت عملية التجميل الناس اعتقدت أني عملتها عشان ارجع تاني أمثل بس انا نيتي كانت إني عايزة ارجع ملامحي مرة تانية وابقى في حالة رضا عن نفسي.

وفاء سالم: مكنش هدفي من عملية التجميل الرجول للتمثيل

وتابعت: أنا مكنتش عايزة شكلي يصغر أو يكبر زي ما اتقال عني وجلسة التصوير اللي انتشرت كانت تبع الدكتور اللي عملي عملية التجميل ومكنش هدفي الناس تشوف صوري عشان ارجع أمثل.

وفاء سالم: شركات إنتاج كانت عايزاني في بطولة أعمال 

وكشفت وفاء سالم: في نجمات كلموني وقالولي ان في شركات أنتاج كبيرة بتحط اسمي على بطولات اعمال عشان اشتغل معاهم.

وفاء سالم: التمثيل انتهى بالنسبالي

وتابعت: التمثيل انتهى بالنسبالي وطالما انا مش عارفه احقق قيم الحق والخير في المجال يبقى مش هرجع امثل.
وأضافت وفاء:  من وأنا صغيرة لما قررت امثل حطيت في ذهني قيم عايزه أقدمها وانا لقيت اني مش عارفه اعمل كده ودخلت في حاجات ملهاش اي لازمه او اي معنى يبقى ليه اعمل في نفسي كده.

واستكملت:  دوري مبقاش بيتقدم وبيعمل فاعلية زي ما انا كان نفسي يحصل وانا مش داخله اتصور ولا حاجه انا كنت عايزه اقدم هدف نبيل وطالما انا عجزت اني اعمل كده يبقى مش هكمل.

واختتمت وفاء حديثها: انا اتجهت في حته تانيه والتمثيل انتهى بالنسبالي ودوري دلوقتي راح في حته تانيه وانا ليا توجه وهدف معين هقدمه عبر قناتي على اليوتيوب.
وكشفت وفاء سالم: انا مكنتش متخيلة ان يبقى في تفاعل معايا بالشكل ده وانا اصلا اعتزلت وقولت انا في السن ده والمقام ده كانوا بيضغطوا عليا باشكل الايحائي بالتحرش وانا سيبت كل حاجه وبعدت، و في بنات المدرس بيتحرش بيها واهلها وكله بيدخلوا من نقطه ضعف البنت وبنصح البنات متخليش نقطه ضعفها علنًا.

كما كشفت وفاء سالم أنها ستكتفي بعرض بعض القصص عبر قناتها بموقع يوتيوب ولا تفكر في تقديم برنامج تليفزيوني موضحة: أنا حاليًا هكتفي باليوتيوب والبرنامج التلفزيوني هيبقى فيها قواعد معينة هتتفرض عليا انا دلوقتي حرة وبقول الحقيقة وانا قولت قضيتي الشخصيه كان عشان اتسألت انتي اعتزلتي ليه.