متظلمهوش.. ياسمين عز: الراجل أما يمشي قدامك بيكون بيأمنلك الطريق

وجهت الإعلامية ياسمين عز نصائحها الذهبية كعادتها خلال برنامج “كلام الناس”، المذاع على قناة mbc مصر، مشيرة إلى أن النساء دائما تظلم الرجل.

تحيا مصر يرصد في ذلك التقرير نصائح ياسمين عز في برنامج كلام الناس

ياسمين عز عن وضع لقب للزوج: أنا غلطت في ايه!

تحدثت ياسمين عز في البداية عن نجاح نصيحتها بشأن وضع ألقاب لزوجها أثناء ندائه، فقالت: الستات عجبهم الاقتراح وبدأو في تنفيذه فورا وواثقة إن الأيام الجاية هينتشر الموضوع وكله هيقول استاذ وودكتور وكل الألقاب.

وتابعت: بعض الناس كانوا معترضين على الفكرة.. هو اللي قولته غلط يجماعة.. الاحترام والتقدير وحش أما انتي تقوليله يا أستاذ وهو يقولك يا هانم ده نوع من الوقار والاحترام، زمان كانوا ماشين كدة ومكنش فيه طلاق.

ياسمين عز: جوزك أما يمشي قدامك بيكون بيعيشك في مواكب الفراعنة

وتطرقت ياسمين عز لتوجيه نصيحة جديدة للسيدات، فقالت: في موضوع منتشر اليومين دول إن الراجل بيمشي قدام الست عشان مش عايز يمشي معاها.. لا يحبيتي هو مش بيعمل كدة عشان مش عايز يمشي معاكي أو جنبه او تسمعيه في التليفون هتفضلي لحد إمتى ظالمة الراجل!

وأضافت: هو بيعمل الحركة دي من روح الفرعون اللي جواه بيعيشك بيعشك في مواكب الفراعنة وانتي الملكة، ماشي قدامك عشان بيأمنلك الطريق.. يمكن يكون فيه حفرة أو حد هيعاكسك أو حربوءة هتعطف عليكي، افترضي ديما حسن النية مع الفرعون جوزك هو نازل معاكي يوم إجازته عشان يبسطك مش تنكدي عليه عشان سابقك بكام متر، ممكن تقفي عند محل وهو مش واخد باله فطبيعي هيسبقك مش نازل سباق عشان تحسبي هو سابقك كام متير هو بأمنك ويوسعلك ميبقاش خلقك ضيق خلي صدرك رحب وانتي اقفي براحتك عن المحلات.

ياسمين عز: جدي كان هيكمل قرن بسبب جدتي

وتحدثت ياسمين عز عن جدتها، فقالت: محمد الكبير جدي كان راجل معمر بسب جدتي كان فضله سنتين ويكمل قرن، لو قولتلكم كانت بتقوله ايه هتموتوا مني كان عنده سرير زي حريم السللطان وكانت بتقعد تهويله.

وتابعت: أول ما جوزك يقبض الفلوس أو المرتب أو الجمعية تقوليله عايزة أعمل شعري بروتين، كلنا عايشن بالأنانسة محبكتش تروحي تعملي بروتين لشعرك وده بيضر صحتك وصحة جوزك اعمليله  صنية بط بالبرتقان، محدش يستخدم بروتين يجماعة والحاجات اللي جيلنا من برة غلط جدتنا كانت بتتصور جمب التليفزيون الملون.