يسرا: برقص وبغني وعمري ما فكرت أقول مينفعش أعمل كده أنا كبرت

استضاف برنامج كلام نواعم، النجمة الكبيرة يسرا في لقاء مميز تحدثت خلاله عن عمرها وكيف تستمتع به.

تحيا مصر يرصد تصريحات يسرا عن عمرها. 

تصريحات يسرا عن عمرها

وقالت يسرا: عمري ما فكرت أقول مينفعش أعمل كده أنا كبرت.

وتابعت: بحترم السن اللي وصلتله، والناس هيقولوا إنتي بترقصي في أماكن وبتغني، طبعا برقص وأغني أنا بحب أنبسط، وأعيش، وبحب الناس اللي معايا يكونوا مبسوطين، العمر مجرد رقم.

كشفت النجمة المتألقة يسرا عن رأيها في السوشيال ميديا وسلبياتها، وذلك خلال لقائها في برنامج ABtalks مع الإعلامي الإماراتي أنس بوخش.

وقالت: الناس بتحكم على الفنان 24 ساعة وبيطلعونا شياطين على السوشيال ميديا ويصححوا أفعالنا، والجمهور بيغزو حياتنا لدرجة إني بتعب ومبقدرش أبتسم أحيانًا؛ لأننا عندنا ضغوطات ومش سعداء دايمًا، وقبل السوشيال ميديا مكنش حد بينتقد فنانة عشان لبست بيكيني وكان عندنا حرية وخصوصية.

وتابعت: إحنا كنا أسعد وعندنا حرية ووقت خاص لينا ومحدش بيقتحم خصوصيتنا قبل ظهور السوشيال ميديا، ومكنش حد بيحكم علينا وبقينا نتعرض لانتقاد أكتر حاليًا، عكس من 40 سنة وبدأت أعاني من السوشيال ميديا، لدرجة الناس بيصورونا وإحنا بناكل وينشروها على السوشيال ميديا، ليه بتصورونا وإحنا بناكل؟ سيبونا في حالنا ليه بتقتحم خصوصيتي كدا؟

وأضافت: فيه اللي بيقتص الكلام وياخد كلمتين ملهمش علاقة باللي بقوله وينشرهم، ودا ميصحش على الأقل بالنسبة لآداب السلوك والأخلاقيات ودي ملهاش علاقة الشخص متعلم ولا لا، ولكنها الطبيعة الإنسانية، مثلا لو لقيت شخص أكبر مني سنًا ومش لاقي مكان يقعد هقف له لأني اتعلمت دا في المدرسة.

واختتمت يسرا حديثها، قائلة: في النهاية أنا اخترت الشهرة ولازم أتحمل عيوبها ومينفعش ألوم حد؛ لأني بحب اللي بعمله وبحترمه وأنا مدينة للناس اللي بيحبوني ولكن بقول لهم سيبولي وقت عشان أقدر أكمل والمفروض يكون فيه تقدير للخصوصية أكتر زي ما أنا بقدر حبهم.

أوضحت النجمة يسرا بعض التفاصيل الخاصة بمسلسلها الجديد الذي من المنتظر طرحه في الموسم الرمضاني القادم، وذلك خلال حوارها اليوم ببرنامج “أسرار النجوم” في حلقة خاصة من مهرجان البحر الأحمر.

حيث قالت يسرا: "هيكون مسلسل كوميدي اجتماعي عشان حاليا كل ما تفتحي التليفزيون تلاقي حرب، كورونا، كله نكد في نكد، طب على إيه يا جماعة، ما نضحك بقى شوية".

تفاصيل مشهد الإعدام في فيلم “امرأة آيلة للسقوط”

وفي الحلقة ذاتها، كشفت الفنانة يسرا عن تفاصيل مشهد الإعدام في فيلمها “امرأة آيلة للسقوط”، حيث قالت يسرا: “أنا فاكرة أن مدحت السباعي قالي أنا هبنيلك أوضة الإعدام قولتله لا أنا هروح وهقف على طبلية الإعدام راح قالي أنتي مجنونة مش هتستحملي قولتله لا لازم أروح”.

وتابعت: “روحت وشميت ريحة الموت، رغم إني ما كنتش شايفة حاجة، ووقفت مع عشماوي بس قلت له أوعى تشد الإيد بالغلط، ورجعت البيت متقطعة لأنهم بيربطوك بأحزمة وأنا اتسحلت في الأرض بجد مش تمثيل لأن رجلي ما شالتنيش، ولما وقفت على طبلية الإعدام ما حسيتش بالدنيا”.

تكريم يسرا في مهرجان البحر الأحمر

وكانت قد كرمت الفنانة يسرا في حفل افتتاح الدورة الثانية لـ مهرجان البحر الأحمر، اذ حصلت على جائزة اليُسر الفخرية، وأعربت يسرا عن سعادتها البالغة بهذا التكريم، مشيرا إلى تلك الدورة مميزة من بدايتها.