أحمد شيبه: الراب مش فن وخلقي ضيق وبروح أغني وأنا شايل الهم

تحدث الفنان احمد شيبة عن الراب ومطربي الراب، كما تحدث عن علاقته بشقيقه الذي توفى مؤخرًا، وتطرق بالحديث عن أبنائه وعلاقته بيهم.

تحيا مصر يرصد لكم تصريحات أحمد شيبة

وقال شيبة خلال استضافته في برنامج حبر سري التي تقدمه الإعلامية أسماء إبراهيم ويُعرض عبر قناة القاهرة والناس: انا بحب اللي بيغني راب بس الفن المزيكا مش كده، انا مش بكرهم بس انا مش بعرف اغني راب بقول لصحابي بتوع الراب يجوا يعلموني.

أحمد شيبة: الجمهور هو اللي عملني ولو غليت سعري مفيش حد هيطلبني

وكشف شيبة: مكنتش اقصد حد لما كتبت اللي بيرفع أجره مش بيحترم جمهوره وبتكلم على نفسي والجمهور اللي عملني والناس تعبانه ولو غليت سعري مفيش حد هيطلبني.

أحمد شيبة: أنا خلقي ضيق وبروح أغني في الفرح وأنا شايل الهم

وتحدث أحمد شيبة عن شائعات خلافاته التي تحدث مع الجمهور في الافراح وقال شيبة: مش بعمل خناقات مع الجمهور بس خلقي ضيق اوي وبحترم جمهوري بس مفيش حد خالي من الهم وبروح افرح العريس والعروسه وبيقابلني حاجات وبستحمل فوق طاقتي.

أحمد شيبة: مش بضرب عيالي ومش عايزهم يتعمل فيا زي ما أتعمل فيا من أنا صغير

وتطرق شيبة بالحديث عن أبنائه وقال:انا مش بضرب ولادي وانا كنت بتضرب كتير وأنا صغير وعايزهم احسن مني ومش عايزهم يحسوا بأي حاجه حسيت بيها وانا تعبت وانا صغير.

وتحدث شيبة عن علاقته بشقيقه وقال: الناس اللي بتقول إني دفت أخويا وروحت فرح أغني حسبي الله ونعم الوكيل  فيهم انا قعدت اسبوعين وروحت الشغل عشان مصاريفي وأكل عيشي.

وتابع شيبة: أخويا قبل ما يموت كنت بقوله هنعمل كافيه وتقف فيه وهو اتخطف مني ومكنش تعبان وابنه اتصل بيا وقالي بابا مش بيتكلم .

أحمد شيبة: الاخ ميتعوضش وكان نفسي اعمل كل حاجة مع أخويا

وأضاف شيبة: خدت اخويا وروحت المستشفى قالولي بعد ساعه انه مات ومكنتش عارف اقول لامي أن اخويا اتوفى والاخ ميتعوضش كان نفسي اعمل كل حاجه مع اخويا.