استعملي عيونك الشتوية وخلي شعرك بيهفهف.. 23 نصيحة من ياسمين عز لحياة زوجية سعيدة

مع نهاية عام 2022، واستعاداد الجمهور لـ استقبال عام جديد 2023، حرصت الإعلامية ياسمين عز على تقديم 23 نصيحة للسيدات للحفاظ على حياة زوجية سعيدة، ويرصد تحيا مصر في ذلك التقرير أبرزها

نصائح ياسمين عز لحياة زوجية سعيدة

قالت ياسمين عز خلال برنامجها كلام الناس المذاع على قناة mbc مصر:  متبقيش زنانة وفتانة ومتخليش سيرتكم لبانة الحاجة تطلبيها من جوزك مرة واحدة بس معملهاش تفكريه بيها،  وحاجتين متعملهمش في 2023 إنه ينادي عليكي وتعملي مقموصة ومترديش أو تتخانقوا فترزعي الباب في وشه، غير مسموح إنك تعملي تصرف زي ده

وأضافت ياسمين عز: بدل ما تفتشي في جيب جوزك حطيله فيه بونبوناية او تكتبيله مش محتاجين أي حاجة غير حسك في الدنيا، وقتها هيجبلك كل السوبر ماركت وهو جاي من البيت، وبلاش تسأليه رايح فين الجملة دي قديمة، لو حب يقول خلاص مقالش ملناش دعوة.. والعبي دور الأم في حياته الراجل بيحب الدعوة الحلوة فادعيله.

ياسمين عز: لازم تكسبي حماتك ومترديش على جوزك في لحظة غضبه

واستكملت نصائحها: لو اتخانقتوا مع بعض اسكتي وسبيه يزعق ويخرج كل غضبه وطاقته براحته ومترديش خالص التزمي الصمت وحطي نفسك على وضع الطيران، قلب الراجل مفيش أطيب منه بيجي لوحده يعتذرله لكن هتعلي صوتك وند بند الموضوع هيكبر وهيبقى مش لطيف، ومفيش حاجة اسمها أتقمص وما اعملش أكل لازم الراجل يرجع البيت يلاقي الأكل موجود

لازم تكسبي حماتك وأخته رضاهم زي رضى أمك وأختك وهتعيشي في سعد طول عمرك، وجوزك يسمع كلام حلو وحاضر ونعم وتمام وأوامرك يحبيبي وشكرا.. مش بيحب كلمة بحبك بيحب حاضر وشكرا وبتأسره عشان بتحسسيه بالإمتنان والتقدير

ياسمين عز: قولي لجوزك يا أميري وقبل ما يجي بساعة خلي شعرك مهفهف

وتابعت: قبل ما يجي بساعة خلي شعرك  مهفهف  وريحتك حلوة وبشاشة الوجه وطيب اللسان واتجنني كل فترة ودللي جوزك ودلعيه وقوليله كلام جب وغزل قوليله يا أميري لو قالك متكلميش كذا علم من غير نقاش والتقدير وديما حسسيه إنه البطل بتاعك وخليه يفتح برطمان الصلصلة وإن ماسكة مضرب النموسة مختلفة عن أي حد تاني حسسيه إنه بالنسبالك أحسن وأهم من الرجال اللي بيلعب جولف، هو أحرف من أحرف لعيب بيعلب جولف وهو بينشن على النموسة

بعد الصوت الشتوي.. ياسمين عز تنصح النساء باستخدام العيون الشتوية

واختتمت: صوتك الشتوي اللي نسيتيه بعد ما اتجوزنا رجعيه تاني والعيون الشتوية النعسانة.. وانتي بتكلميه ضيقي عينيكي وسهتني عنيكي عشان يحس ببراءتك.. لو جمعنا بين العيون الشتوية والصوت الشتوي هتكون حياة تانية تخيلي صوت هادي وعيونك مدبلة وسهتانة