سلوى عثمان: حطيت عقد في زواجي إني مسيبش شغلي لأنه رقم واحد في حياتي

كشفت الفنانة سلوى عثمان عن زيجاتها، كما تحدثت عن حبها لزوجها، وتطرقت بالحديث عن عملها كفنانة وحبها الشديد لمهنة التمثيل.

تحيا مصر يرصد لكم تصريحات سلوى عثمان

وقالت سلوى عثمان خلا استضافتها في برنامج كلام الناس التي تقدمه الإعلامية ياسمين عز ويعرض عبر قناة ام بي سي مصر: اتجوزت مرتين والمرة الأولى انفصلت وبعد كام سنة اتجوزت زوجي الحالي وبقالنا 15 سنة متجوزين.

سلوى عثمان: كتبت في عقد زواجي شرط على جوزي اني مش هسيب شغلي

وتابعت: شغلي بالنسبة لي خط أحمر مع أي حد بتجوزه وبتفق أني عمري ما هسيب شغلي وحطيت بند في عقد زواجي من زوجي الحالي علشان الشغل والمأذون سألني في شرط عاوزة تحطيه في العقد قلت له أني ما أسيبش شغلي.

وأضافت: زوجي الحمد لله حابب الشغل بتاعي ومتفهم، وعارف أني بكون مشغولة في رمضان وساعات بنبات في الشغل وعنده فكر ومحتوي الموضوع، ومع ذلك أنا مش بقصر معاه في البيت مش معنى إني مشغولة ما عرفش حاجة عن هدومة وشغله لكني عندي ترتيب في حياتي أني ما أقصرش.

سلوى عثمان: الشغل رقم واحد في حياتي

واستكملت سلوى: الشغل رقم واحد في حياتي، وبحاول أيضًا أن زوجي يكون رقم واحد وبكون مسؤولة عن كل شيء يخصه من لبس وأكل.

وأكدت سلوى: التفاهم مهم جدًا في العلاقة وبتعمر الحب، والحب ممكن يروح لأسباب مختلفة لكن لو متفاهمين هيقدروا على الحياة الزوجية لأن الحب ممكن يضيع بأي شكل.

وتابعت: لازم الخلافات تكون متقبلة بين الطرفين لأني ممكن أقبل عيوب في جوزي واحدة تانية ما تقبلش بيها والعكس لأننا مش ملايكة وكلنا عندنا عيوب وكل واحد له شخصيته ولازم يكون فيه تفاهم، وفيه حد لازم نقف عنده من غير ما نعديه وده نوع من التفاهم.

سلوى عثمان: أنا عصبية جدًا وزوجي هادي

وأضافت: في حاجات ممكن تعديها وحاجات لأ، أنا مثلًا عصيبة أكتر منه وهو بيكون هادي وساكت وهو لما يتعصب بهدى كل واحد فينا بيستحمل التاني، لكن العصبية ليها حدود ما ينفعش يدخلوا في مناطحات وألفاظ مش لذيذة.