وفاء مكي باكية: معنديش قوت بكره.. وأنا واحدة قليلة الحيلة لا حول بيا ولا قوة

انهارت الفنانة وفاء مكي من البكاء أثناء استغاثتها بالدكتور أشرف زكي نقيب المهن التمثيلية بسبب ظروفها المادية السيئة، وذلك خلال حوارها اليوم على موقع تحيا مصر.

تحيا مصر يرصد تفاصيل تصريحات وفاء مكي عن ظروفها السيئة

حيث قالت وفاء مكي باكية لـ تحيا مصر: “يا دكتور معنديش قوت بكرا.. لما عملت استغاثة لرئيس الجمهورية عشان دا أب وأخ وسند وضهر ومعنديش حد تاني أعمله استغاثة عشان أنا واحدة قليلة الحيلة لا حول بيا ولا قوة”.

استغاثة وفاء مكي بنقابة الممثلين

وتابعت: “أنا عايزة أرجع أقف على رجلي تاني عشان أشوف أمي ومتتبهدلش في أخر أيامها ولا العيل الصغير المسئول مني أبوه مات وكان راجل ظابط في الجيش”.

وأضافت: “فيه أكتر من عمل فني بيتعمل لو كل واحد فينا ياخد عمل بدل ما الواحد ياخد خمس أعمال بيوتنا هتتستر وهنصرف على نفسنا، ومينفعش عشان يرضوني يدوني دور أي كلام لازم أرجع بمكانتي”.

استغاثة وفاء مكي 

ومن جانبه، استغاثت الفنانة وفاء مكي عبر مقطع بحسابها الرسمي في تيك توك، بالرئيس عبد الفتاح السيسي بسبب عدم حصولها على فرصة عمل.

وقالت وفاء مكي خلال المقطع: نداء واستغاثة للرئيس السيد عبد الفتاح السيسي، يا فندم انا عملت اكتر من 86 بطولة عمل، وحبيت ارجع شغلي تاني وطرقت كل الأبواب لكن لا حياة لمن تنادي.

وتابعت: الدراما كلها مليانة وجوه جديدة محدش عارفها وبيدوهم بطولات مطلقة، أنا تعبت ومعنديش مصدر تاني ولا شغلانة تانية غير دي انا بعول امي المريضة وابني اليتيم.

وفاء مكي عن محمد رمضان

كما كشفت الفنانة وفاء مكي حقيقة مهاجمتها للنجم محمد رمضان، وذلك خلال حوارها اليوم على موقع تحيا مصر.

حيث قالت وفاء مكي لـ موقع تحيا مصر: “أنا معرفش محمد رمضان علشان أهاجمه أنا بحب الوسط بتاعي.. وأنا أهاجمه بتاع ايه، دا واحد كان بيقول يا أستاذة احنا هنعمل مع محمد رمضان فيلم تيجي ضيفة شرف فيه؟.. روحت قولتلهم لا ياجماعة مينفعش أقل عن مستوايا وبقالي كتير مرجعتش ولما أرجع أرجع كدا؟”.

وتابعت: “أنا بحب وسطي وبحب صحابي وبحب شغلانتي ومقدرش أغلط في حد فيهم لأني مشوفتش منهم غير كل خير والدكتور أشرف راجل محترم، ويوم ما رفعت السماعة وقولتله أنا أمي بتموت في المستشفى ومحجوزة وعايزة فلوس مرة أداني 20 ألف ومرة أداني 25 ألف”.