دياب: الجمهور بيحب أدوار الشر وأنا لسه ببدء طريقي ومعملتش حاجات عظيمة

تحدث الفنان دياب عن شخصيته في حكاية في التاكسي، ضمن مسلسل في كل أسبوع حكاية، كما تحدث دياب عن مشواره الغنائي.

تحيا مصر يرصد لكم تصريحات دياب

وقال «دياب»، خلال مكالمة هاتفية ببرنامج «في المساء مع قصواء»، المذاع على قناة «CBC»، وتقدمه الإعلامية قصواء الخلالي: المشروع عبارة عن 6 حواديت وكل حدوتة ليها أبطال مختلفة، وأنا بطل حدوتة منهم وهي حدوتة في التاكسي ومعايا زملاء كتير، وإخراج الأستاذ محمد عبد الرحمن حماقي، وكاتبها أستاذ مصطفى جمال هاشم.

وأضاف: الحدوتة حاجة من مشاكلنا اليومية وبنحاول نعرض بشكل مبسط ومُسلي للناس، وده الهدف الأساسي للدراما هو الترفيه عن الناس وفي نفس الوقت بنطرح مشكلة وبنحاول نلاقي لها حل، وبنسيب الأفق للمشاهد لو كان في الموقف ده هيحله إزاي يليق مع وضعه.

دياب: الجمهور بيتفاعل مع الشخصيات الشريرة

وكشف دياب أن الجمهور يتفاعل دائمًا في الدراما والسينما مع الشخصيات الشريرة موضحًا أن دور الشر الثري دراميًا يكون  ممتع للممثل وبيدي له مساحات عن الشخصية الطيبة، ولكن الشخصية الطيبة مكتوبة منضبطة زي دوري في مسلسل نسل الأغراب، بيعجب الناس زي الشر ما بيعجبهم.

كما علق دياب، على تقييمه لتجربته الفنية منذ بدايته حتى الآن، قائلًا: أنا تجربتي لغاية دلوقتي بعتبرها نبتة بحاول أرويها بمشاعري كفنان وتجاربي، ولكن أنا لسه بتحسس الطريق على الرغم من شعبيتي، وعندي أغاني ناجحة معلقة مع الناس زي غمازات والعو، بقالهم 12 سنة وتلاقي أطفال بيرددوها وده نجاح ممتد.

دياب: لسع معملتش حاجة عظيمة

وأضاف: ولو قعدت أفكر أنا نجحت في إيه مش هكمل، ومش شايف إني لسه عملت حاجة عظيمة عشان أقول إني عملت، لأ أنا لسة بتحسس الطريق وبحاول اتطور.

دياب: الأدوار هي اللي بتختارني

أما عن معايير اختياره للأدوار، فعلق قائلًا: الأدوار هي اللي بتختارني، وبختار أفضل المعروض عليا، يعني بشوف أقرب درجات النجاح اللي يرضي طموحي بنسبة 70 %، وفي نفس الوقت ممكن يكون اللي معروض عليا قليل فبختار الدور اللي أقدر أطلع منه حاجة.

واختتم دياب قائلًا: مبحبش أشتغل حاجة وخلاص ويارب موصلش للمرحلة دي، ودي حصلتلي كمغني من غير ما يكون فيه تنازلات أخلاقية.