مسلم: في بداياتي روحت لـ أحمد السبكي عشان يساعدني مرضيش يسلم عليا وقالي روح غني في إسكندرية

كشف المطرب مسلم عن اسم الفنان الذي قام بمساعدته في بداية مشواره الفني، وذلك خلال لقاءه اليوم ببرنامج “كلام الناس” مع المذيعة ياسمين عز.

تحيا مصر يرصد تفاصيل تصريحات مسلم في “كلام الناس”

حيث قال مسلم: “أول لما جيت القاهرة السادات ساعدني، وهو مساعدتنيش أنا بس دا ساعد الناس كلها، ولما جيت القاهرة هو أول واحد سمعني وكان هو مكسر الدنيا وقتها وهو كان معجب جدا بصوتي”.

موقف أحمد السبكي مع مسلم في البداية

وعن موقف المنتج أحمد السبكي معه قال: “أول لما نزلت القاهرة روحت لأحمد السبكي لأني سمعت أنه بيساعد ومطاع ناس كتير ولما روحتله سلمت عليه ومسلمش عليا فقالي عايز ايه فقولتله سمعت أن حضرتك بتساعد وكدا وأنا بغني فراح قالي لا لا روح غني عندكو في إسكندرية والموقف دا أثر فيا جدا وسبحان الله بعدها بيومين كنت حاسس أن الموقف دا مش هيوقعني”.

أسباب اعتزال مسلم

وفي الحلقة ذاتها، كشف المطرب مسلم عن الأسباب وراء إعلان اعتزاله الغناء في الفترة الأخيرة، حيث قال مسلم: “كان عليا ضغط كبير أوي في حتة النقابة وكنت داخل في سنتين أغانيا شغالة في مصر جدا ومسمعة برا مصر في الخليج والوطن العربي ومكنتش بنزل أشتغل عشان مفيش تصريح نقابة عشان الجيش وأنا 21 سنة”.

وتابع: “وكان عليا ضغط بردو في حتة الانتاج ودا أثر عليا نفسيا لان انا اللي كنت بكتب لنفسي وحتة ان انا اكون حر كانت مأثرة في نفسيتي، ولسه مخلصتش نفسي من التعاقد، وقولت أن أنا مش هرجع إلا لما أظبط حالي وأول لما حتة النقابة اتحلت لما دخلت الجيش وامتحنت في النقابة ونجحت واخدت الكارنيه”.

مهن عمل بها مسلم قبل الشهرة

كما كشف المطرب مسلم عن المهن التي عمل بها قبل الشهرة والدخول في مجال الغناء، حيث قال مسلم: “قعدت 3 سنين مؤذن قبل الشهرة وأنا عندي 15 سنة، كان فيه جامع تحت البيت.. كنت كل صلاة أنزل أذن، وكنت ممكن أقعد من الفجر لغاية الساعة 7 الصبح بصلي في الجامع، وبعدها بدأت أخد خطوة في الغنا”.

وتابع: “أنا من زمان كان والدي مطرب وكنت بدرس في الأوبرا في مسرح سيد درويش وأخدت الأول على الجمهورية من أستاذ هاني شنودة.. أنا معتز جدا بحتة الدين ودايما عارف أني مليش غيره في الأخر بس أنا من جوا نفسي بحب موهبتي وبحس أن ربنا مديهالي عشان استخدمها في الخير”.