ماساة زوج.. مراتي بتتهم أمي أنها بتضربها وهي ست طيبة وعمرها ما مدت أيديها علي حد

" مراتي بتكره أمي عشان بتهتم بيا وحنينة عليا ومراتي عايزة تمتلكني ليها لوحدها" بتلك الكلمات روي زوج لتحيا مصر من داخل محكمة الأسرة عن زوجته شديدة الكراهية تجاه والدته والتي تعاملها معاملة مليئة بالقسوة وتقول لها أفظع الكلمات لتجبرها علي الخروج من منزلها وتتركها تعيش مع زوجته بدون ثالث بينهم .

أبويا مات وجيبت أمي تعيش معايا أنا ومراتي

بدأ الزوج حديثه لتحيا مصر :" أنا ومراتي متجوزين من 6 سنين وعندنا ولد عنده 5 سنين وأنا أبقي وحيد أبويا وأمي من صغري مليش أخوات تانيين ومن سنتين جالنا خبر أن والدي توفي وأنا عشان مهانش عليا أسيب أمي تعيش لوحدها جيبتها وعاشت معانا هي في الأول كانت رافضة وقالتلي " مراتك مش بتحبني وحاسة أني لو جيت عيشت معاكم هبقي تقيلة عليكم هي برضه تبقي ست البيت وحرام أبقي عندكم وهي مش راضية بيا " لكن أنا زعلت جدا من كلامها وأصريت أكتر أني أخدها معايا بهدومها عشان تيجي عندنا ولما أتكلمت مع مراتي قبلها في الموضوع كانت بالفعل رافضة وجودها وقالتلي " هو أنا هشيل مين ولا مين ؟ هشيلك أنت وأبنك ولا هشيل كمان أمك ؟" لكن أن مديتش لكلامها أهمية وجيبت أمي تعيش معانا غصب عنها ".

كنت كل يوم أرجع من الشغل الاقي أمي بتبكي

وتابع الزوج حديثه :" في السنتين اللي عاشت أمي معانا فيهم كانوا من أصعب سنين حياتي كنت كل يوم أرجع من الشغل الاقي أمي مش بتعيط وقاعدة لوحدها ولما اسألها هي كلت ولا لا ألاقي مراتي بتقولي " حطيتلها الأكل ومش عاجبها " لكن اللي كنت بحسه أن أكيد أمي مش هترضي تاكل وهي مراتي بتعاملها المعاملة دي في بيتها خصوصا أن أمي عندها عزة نفس عالية جدا وفهمت من عياطها أن أكيد مراتي ضايقتها وبتعاملها معاملة وحشة لكن مش راضية تقول وفي مرة تانية كنت في الشغل ولقيت مراتي بتتصل بيا وبتقولي "أمك ضربتني بالقلم بعد ما زعقت واتخانقت معايا عشان مديتهاش جزء من مصاريف البيت وأنا خلاص مش قعدالك في البيت وهاخد عيالي وأروح علي بيت أهلي " رجعت فورا علي البيت ولقيت أمي بتحلفلي أنها مجتش جنب مراتي  وأنها مش بتعاملها غير أحسن معاملة لكن مراتي هي اللي كارهاها وبتقولها كلام يوجعها طول الوقت زي أن وجودها في البيت خانقها ومخلياها مش واخدة راحتها مع جوزها وأبنها ".

طلقت مراتي عشان ست أنانية ومعندهاش أصل 

وأختتم الزوج حديثه :" بعد المواقف دي كلها واللي كنت ساكت لمراتي عليها وبفهمها بالهدواة روحتلها بيت اهلها وخدت المأذون وطلقتها عشان فهمت من تصرفاتها مع أمي أنها بتعمل كل ده عشان تطفش أمي من البيت وعشان غيرانة منها ومن أهتمامها الزيادة بيا لأن أمي فعلا أمي حنينة عليا طول عمرها لأني أبقي أبنها الوحيد ده غير أن الست اللي تعامل واحدة أكبر منها بالأسلوب ده وهي مشافتش منها إلا كل خير تبقي ست معندهاش أصل لكن هي دلوقتي رفعت عليا قضية زيادة نفقة عشان تضايقني بعد ما طلقتها قدام أهلها وكسرت عينها وعرفتها أني أقدر أستغني عنها وعن أي حد ميحترمش أمي اللي هفضل شايلها فوق راسي لاخر لحظة في عمري ".