الغناء على بعضه غلط وستار أكاديمي كانوا حاطين كاميرات في الحمام.. تصريحات زيزي عادل لياسمين عز

حلت المطربة المعتزلة زيزي عادل ضيفة على برنامج “كلام الناس”، الذي تقدمه الإعلامية ياسمين عز على قناة mbc مصر، وذلك في أول ظهور إعلامي لها بعد اعتزالها الغناء.

وكشفت زيزي عادل خلال البرنامج عدد من التصريحات الجريئة والمثيرة للجدل عن اعتزالها ورأيها في حرامنية الفن ومشاركتها في برنامج “ستار اكاديمي”، يرصدها تحيا مصر في ذلك التقرير.

أبرز تصريحات زيزي عادل

• اكتشفت إني لما أموت مش  هاخد معايا الأغاني والكومنتات، لكن هاخد معايا أعمالي.
• مكنتش محجبة وأما خرجت أعلنت اعتزالي كنت بشعري عادي.
• متجوزتش من داعية اسلامية ولا اعتزلت عشان السبب ده ولكن ممكن تكون بشرة خير.
• مصطفى حسني ساعدني كتير ولجأتله عشان برتاح لكلامه وطريقته والمعالمة معاه.
• محبتش أكون متاحة لكل الناس وصوري اي حد يتفرج عليها ويتحكم فيها ومسحتها كلها وبقيت بلبس محتشم.
• في كذا حاجة غلط بتحصل في الغناء بداية من تصوير الفيديو كليب واللبس اللي هطلع بيه على الاستديج عشان كدة اعتزلت.
• لو رجع بيا الزمن مش هروح برنامج ستار أكاديمي وفكرته لا تناسب تقاليد مجتمعنا، وكان فيه كاميرات في كل مكان حتى في الحمام.
• حصلي لحظة تردد وتذبذب بسيطة في فترة اعتزالي بس الحمدلله قدرت أعدى الاختبار ده وده بفضل مدير أعمالي والداعية مصطفى حسني.
• اتبسطت أوي ان فيه حد أن شجعته حتى لو بنسبة 1% وفي مطربة قالتلي نفسي أخد قرار الاعتزال زيي.
• مش هقدر أمسح الأغاني بس مصطفى حسني قالي ربنا مش هيحاسبك عليها من أول ما قررتي الإعتزال.
• أما روحت لمصطفى حسني كنت رايحة وعارفة إن أنا صح بس أنا كنت عايزة أسمع ده من حد اهل ثقة عشان أكون مطمنة وقلبي مرتاح، وكنت عايزة حد يشجعني اكتر.

اعتزال زيزي عادل الغناء

جدير بالذكر، أنه أعلنت زيزي عادل الغناء في رمضان المنقضي، اذ قالت في فيديو عبر حسابها الرسمي بموقع تبادل الصور والفيديوهات انستجرام: أنا طالعة أقول خبر مهم جدا أخدته في حياتي، ويمكن يكون أهم خبر خدته في حياتي، هو قرار الاعتزال، قررت أسيب المهنة اللي أنا بشتغلها.. ممكن القرار ده ما أخدتهوش إمبارح يعني، أخدته من فترة كبيرة، أنا مطلعتش أقولكم الخبر ده، لإني كنت حابة أتكلم مع نفسي ومع الناس القريبة مني جدا، والناس دي دعمتني جدا لما قولتلهم القرار ده، وشجعوني جدا إني أعمل كده، أنا ببعد عن أكتر حاجة من أكتر المغريات في الدنيا، اللي هى الشهرة، وهبعد عن الشهرة والأضواء والفنانين، اللي هى الناس بتقرب منها.