" مراتي فاضحة عيالي وسط زمايلهم بسبب ريحتهم الوحشة " .. مأساة زوج

"عيالي بيقولولي صحابنا بيقرفوا مننا ومش بيرضوا يقعدوا معانا وكل ده بسبب أمهم " بتلك الكلمات روي زوج لتحيا مصر داخل محكمة الأسرة عن زوجته التي تهمل أطفالها وتقصر في الأعتناء بهم مما أدي إلي نفوره منها والرغبة في الأنفصال عنها .

تحيا مصر 

عندنا 4 عيال ومراتي حامل في الخامس 

بدأ الزوج حديثه لتحيا مصر :" أنا ومراتي متجوزين من 15 سنة وعندنا 4 أولاد وأكبرهم عنده 14 سنة وفي الأعدادية مراتي في البداية مع الخلفة الأولي والتانية كانت ست نضيفة وواخدة بالها من العيال لكن مع تالت طفل مراتي أتغيرت كليا وبدأت تقصر مع العيال وتقصر في مسؤولية البيت بشكل كبير حاولت كتير أشيل عنها لكن ظروف شغلي مكنتش بتسمحلي أني أفضل متواجد في البيت معاها ومع ولادي بشكل كبير لأني فاتح كشك في شارعنا ومهتم بيه عشان أكبره لدرجة أني بفتحه 24 ساعة ".

مش بتحمي العيال ولا بتغسلهم هدومهم لحد ما زمايلهم بدأوا يشتكوا منهم 

وتابع الزوج :" مراتي في الفترات الأخيرة بدأت تهمل العيال وتهتم بشوية منهم وتهمل الباقي وأحيانا تعمل أكل وأحيانا متعملش وأحيانا تنضف وأحيانا لا لحد ما جه الخبر اللي كمل عليها وعرفنا أنها حامل في العيل الخامس ومن هنا بدأت تقصر في كل حاجة لدرجة أنها بقيت تنزل العيال المدرسة وهدومهم مش مغسولة وولا مستحميين بالـ10 أيام لا وكمان تبقي ناسية تحطلهم فطار وتقولهم خدوا مصروف من أبوكم مشوا بيه نفسكم لحد ما العيال نفسيتهم تعبت وبقوا يرجعوا معيطين بسبب الكلام اللي بيسمعوا من زمايلهم أنهم ريحتهم وحشة ويبقوا زعلانين أنهم معهمش أكل وسندوتشات زي بقية زمايلهم ".

بتقولي عايزني أعملك أية ولا أية ياريتني ما أتجوزت 

وأختتم :" أكتر من مرة أنبهها أن الكلام ده مينفعش وأني غصب عني لازم أركز أكتر مع شغلي عشان أجيبلهم مصاريف تعيشهم وتكفيهم وبالتالي لازم هي ترعاهم لأنهم لسة أطفال لكن ألاقيها تضايق من كلامي وتقولي " عايزني أعملك أية ولا أية ياريتني ما اتجوزت ولا شيلت الهم والقرف ده كله لوحدي " ومع الوقت مبقيتش قادر أستحمل العيشة معاها وطلقتها لأنها ست مهملة ومش مقدرة قيمة النعمة اللي في أيدها انها عندها زوج بيرعاها وأطفال زي الورد لكن الطلاق مأدبهاش وراحت كمان المحكمة ترفع عليا دعوي زيادة نفقة للعيال وأنا ربنا يقدرني وأديلهم كل اللي هما محتاجينه لأنهم هيفضلوا ولادي حتي لو أمهم ست متتعاشرش ".