مليش في التريند زي علاء مرسي و المسرح لو هيؤرخ يبقى باسم محمد صبحي.. أبرز تصريحات رياض الخولي

فجر الفنان رياض الخولي عدد من التصريحات وذلك خلال ندوة تكريمه المقامة بمهرجان شرم الشيخ الدولي للمسرح الشبابي في الدورة السابعة.

تحيا مصر يرصد تصريحات رياض الخولي خلال ندوة تكريمه المقامة بمهرجان شرم الشيخ الدولي

تصريحات رياض الخولي خلال ندوة تكريمه المقامة بمهرجان شرم الشيخ الدولي

وقال رياض الخولي خلال الندوة: محمد صبحي أثناء البروفات يقول مثلًا البروفة الجاية تسميع، ده منهج أنا شخصيًا أتفق عليه، ولو هيؤرخ المسرح يبقى باسم محمد صبحي، لأن  مسرحه ملتزم وبيحترم عقلية المُشاهد ووجدانه وحتى بيحترم مواعيده ويحترم الكرسي اللي بيبقى قدامه على المسرح، حتى العدسات كلها بتتلمع كأنها جديدة وهو ده مسرح صبحي.

وأضاف رياض: أنا استفدت منه جدًا، عملت معاه تجربتين ماما أمريكا ووجهة نظر، واختلفت في آخر موسم في ماما أمريكا، وهو حتى قال عن الخلاف رياض الخولي لما سابني كان بشرف، وعملت معاه مسرحية مع سميحة أيوب مصورتهاش وسبتها في آخر الموسم وصورها سامي العدل الله يرحمه وكان الخلاف بيني وبين أسامة أنور عكاشة.

وتابع رياض: وبعدين بدأ التلفزيون ياخدني، وكان ساعتها  المسرح في مرحلة رديئة لو أجاز التعبير، ولما تقلدت بعض المناصب كانت الحكاية بتطلع فيها مظلوم والإدارة عفنة ومملة ويطلعوا عينك، وقلت ساعتها لفاروق حسني، وإن حتى الأماكن الخاصة بالمسارح عشان مثلًا تدخل العتبة من رابع المستحيلات، هركن فين؟، ومثلًا مسرح ميامي ما زال حتى هذه اللحظة مفيش مواطن يعرف هو فين وبنكتب بجوار سينما ميامي، محتاجين يكون فيه اهتمام بالمسرح ووجود التقنيات الحديثة.

واستطرد رياض الخولي: في 2001 كان فيه حوار دار بيني وبين سميحة أيوب وأسامة أنور عكاشة وقلتلهم المسرح بيخلص، التلفزيون بيحقق الدهشة والإبهار والمسرح لا يحققه، النهاردة عندنا فوق الألف قناة، لأن المسرح تقليدي ما زال لسة الستائر بتتشد بحبل، إحنا محتاجين مسارح بتقنيات حديثة.

وعن الفن قال رياض الخولي: قضية الشكل والمضمون أيهما يفرض؟ الشكل يفرض عليك إن الأفق بتاعك يبقى سليم، ومحتاجين هذه النوعية، لكن الحركة اللي موجودة والسادة المسئولين عن ده هما في غفلة، احنا سايبين الواقع بتاعنا.

وأضاف رياض الخولي: آن الأوان نغير دا، ودا في إيد السادة المسئولين ووزارة الثقافة تحديدًا،  بعض المحاولات الشبابية تحترم ولكنها محاولات ممكن تتقتل في لحظة ومتبقاش في منطقة لمعان وتختفي في لحظة.

واستكمل رياض حديثه: اللعبة دي ملهاش قانون، كنت بعمل مسلسل في قطاع الإنتاج اسمه الصعود إلى القلب وكنت مراهن عليه، لو قدر لهذا المسلسل النجاح هيكون وثيقة للتليفزيون المصري، وخدها محمد رياض عليها تريقة فيما بعد، لما اتعرض مر مرور الكرام لأسباب إن المؤلف عاطف البكري هو أخرجه وجري ورا الصورة.

أسباب قلة ظهور رياض الخولي إعلاميا

وكشف الفنان رياض الخولي أسباب قلة ظهوره إعلاميًا قائلًا إنه يفضل عدم الظهور في الإعلام لأنه يرى أن دوره في تقديم أدوار تسعد الجمهور، معلقًا: أنا راجل ممثل وبقدم مسلسلات لكن كمان أروح ندوة اتكلم فيه عن نفسي بشوفه فجر ده.. وأترك الآخرين يتحدثون وهذا حق المشروع لكل واحد يقول رأيه، لذلك أنا بنسحب من هذه الساحة.

وتابع الخولي: ظهرت في آخر إنترفيو مع الإعلامية إسعاد يونس في العشرين السنة الأخيرة، ووفقت بعدما كلمتني الفنانة إسعاد يونس.

وأضاف الخولي: أنا مليش في التريند أشباه أزمة علاء مرسي الأخيرة والسوشيال ميديا، وأنا مهموم بقضايا الأمة والوطن والأجتماعية والفقراء والمهمشين والناس البسطاء بحبهم جدا.. وأنا رجل ناصري.