روان داخل محكمة الأسرة : جوزي بيطلب أكلات غالية وأحنا معناش فلوس وبيضربني لو مأكلتهوش اللي طلبه

" جوزي بيحب الأكل أكتر مني " بتلك الكلمات روت روان داخل محكمة الأسرة لتحيا مصر عن زوجها الذي يعشق الطعام ويطالبها بأن تصنع له أشهي الأكلات وأغلاها ثمنا ولكن بغير قدرتهم المادية .

تحيا مصر 

كان معانا فلوس ومرتاحين وبعدها الحال أتغير 

بدأت روان حديثها لتحيا مصر :" أنا وجوزي متجوزين من 10 سنين وعندنا 4 أطفال كان فاتح قهوة وكانت مصدر دخل ورزق كبير جدا بنسبالنا لحد ما حصلت عليها مشاكل من سنة وأتقفلت ومن وقتها وهو شغال في محل عصير والحال بينا ضاق جدا ومبقيناش حتي عارفين نكفي مصاريف عيالنا الأربعة وحتي طباع جوزي كلها أتغيرت بعد ما كان طبعه هادي وكريم بقي عصبي طول الوقت وبيدينا الجنية بالعافية ".

بقي بيطلب لحمة و كوارع وسمك وأحنا معناش فلوس 

وتابعت :" جوزي في الفترة الأخيرة بقي بيديني مصروف للشهر كله والمصروف ده مش بيكمل معانا أسبوع فكنت بضطر غصب عني أعمل أكلات بسيطة ومش مكلفة زي الفول والبطاطس والعدس لكن هو مكنش بيعجبه الأكل ويقولي " الأكل ده تأكليه لعيالك لكن أنا تعمليلي لحمة وكوراع يأما هتجوز عليكي " مكنتش برضي أحرجه وأقوله أن الأكل ده علي قد ظروفنا وحالنا وأنه حتي لو قرر يتجوز عليا مش هيعرف يصرف عليها هي كمان واللي كان بيجرحني أنه كان بيفتكرني مش شايفة واجبي كست ومكسلة أطبخله اللي هو عايزه وأنا عمري ما كنت كدة معاه ".

ضربني عشان أكلة سمك وقررت أخلعه 

وأختتمت روان حديثها :" في مرة حاولت علي قد ما أقدر أحوش فلوس من مصروف البيت وجيبت سمك وبعد ما جهزته وحطيته علي الترابيزة سألني " فين النايب بتاعي ؟ دي سمكاية واحدة بس وأنا باكل 3 " قولتله " معلش ده اللي قدرت أجيبه " راح ضاربني وكسر الأطباق وأنا من وقتها وأنا سايباله البيت وواخدة عيالي وقررت أجي المحكمة أخلعه عشان ده راجل بيعمل حساب للأكل أكتر مني أنا وعياله ومش عارف يقدر الظروف اللي هو أصلا حاططنا فيها ربنا يعوضني خير وهجيب حقي من معاملته الصعبة ليا بالقانون ".