عمر خورشيد: بوسة والدتي لعادل إمام اخر بوسة في تاريخ السينما

تحدث الفنان عمر خورشيد عن مشهد والدته علا رامي مع عادل امام في فيلم حنفي الابهة، كما تحدث عن هجومه على محمد حسان ومحمد حسين يعقوب.

تحيا مصر يرصد لكم تصريحات عمر خورشيد

وقال عمر خورشيد خلال لقائه في تحيا مصر: من وأنا صغير وأنا بتفرج على فيلم حنفي الأبهة والفيلم ده كان بالنسبالي كوميدي وعمري ما بصتله بصه وحشة وبوسة والدتي لعادل إمام اخر بوسة في تاريخ السينما تقريبًا.
وأضاف: مثلت محمد حسان ومحمد حسين بالعقوب بالشيطان بسبب الفتاوي اللي طلعوها أن في جهادين انضموا إليهم بعد فتاويهم.

وتابع: واللي بيأيدوهم قلوا أدبهم عليا وأنا قولتلهم طريقتكوا بتدل على اللي بيعلموكوا لما ده تلميذ داعية ديني بالأخلاق دي يبقى أنت افصحت عن هوية معلمك.

واستكمل: وأنا عمري ما هقتنع بواحد راكب عربية تمنها معدي 10 مليون ومتجوز 22 واحده وبيطلع يدعوك للتقشف وحقق تتربح من فكرك بس متجيش تقولي تقفشف.

عمر خورشيد: انا معترض على رجال الدين

واستطرد: وانا معترض على تجار الدين اللي بيأيدوا محمد حسان ومحمد حسين يعقوب لما هاجمتهم نشروا صورة لوالدتي وهي بتبوس عادل إمام وكان هدفهم هدم فكري، وان اللي بيتكلم عن الشيوخ امه بتتباس.

واستكمل: ايه علاقة وجهة نظري وفكري بحاجة اتعملت من 31 سنة وده ميأثرش في الكلام اللي انا قولته.  

عمر خورشيد: أنا بصنف نفسي جان كوميديان

وقال عمر خورشيد انه يفضل الأدوار الكوميدية وقال: أنا بصنف نفسي جان كوميديان وأنا بحب الكوميديا لكن دايما بيجبوني في ادوار مش كوميدي وبيجبوني الولد القمور الجان اللي البنات بتحبه وأنا مش بحب الأدوار دي عايز الناس تتفرج على عمل ليا تتبسط والناس هتستفيد ايه لما أطلع حلو والبنات بتحبني؟

عمر خورشيد: احنا بقينا نشوف التريند أكتر ما بنشوف العمل الفني

وتابع: احنا بقينا نشوف التريند أكتر ما بنشوف العمل الفني والجمهور العادي بقى يشوف الفيديوهات الـ 30 ثانية أكتر من الفيلم اللي بيبقى ساعة ونص وبيقيس نجاح العمل بالتريندات اللي حصلت عليه وكم القفشات اللي طلعت من العمل، ومبقاش في مقاييس ولا دراسة تحتم انك تبقى مشهور أو فنان في الوقت الحالي والمهم الأستمرارية، كذا حد كلمني وقالي هتيجي تطلع في الفيديو بس وكل حاجه جاهزة وانا لو هعمل حاجة على اليوتيوب هعمل حاجة بشكل بروفيشنال وهيبقى الموضوع مكلف جدا والموضوع متعب وهياخد وقت مني كبير، وأنا رفضت لأن الموضوع بياخد وقت ومجهود كبير جدًا وانا هستفيد بالوقت والمجهود ده في اعمال فنية مسلسل او فيلم.