مأساة شيماء : جوزي حرض عليا صحابه يضربوني وبيقولي بحبك وعايزك ترجعى ليا

" جوزي عايز يرجعني بلطجة وانا خلاص بطلت أحبه " بتلك الكلمات روت شيماء لتحيا مصر من داخل محكمة الأسرة عن زوجها الذي سئمت الحياة معه والعنف  الذي يعاملها به هي وأبنائها حتي وصل به الأمر أن يرسل لها أصدقاؤه ليتعدوا عليها في الشارع ويشوهون جسدها إجبارا علي الرجوع له ولبيتها ".

تحيا مصر

جوزي بلطجي ومدمن مخدرات 

بدأت شيماء حديثها لتحيا مصر :" أنا وجوزي متجوزين من 5 سنين وعندنا بنت عندها 4 سنين جوزي بيشتغل سواق ميكروباص وبيشرب مخدرات مضيع عليها كل فلوسه بيعدي علينا وقت مش بيبقي معانا حق اللقمة اللي بناكلها كل صحابه سوابق وعليهم أحكام وهو بعشرته ليهم أتطبع بطبعهم وبوظ سمعتنا بسببهم " .

غلطة عمري أني أختارته 

وتابعت حديثها :" جوزي حياتي معاه كانت جحيم من أول يوم جواز ضرب وإهانة وخيانة وإستغلال مش بيفكر في حاجة غير في الأكل والنوم والجنس الناس كلها حذروني منه وأنا وقتها كنت صغيرة وعندي 18 سنة وعجبني كلامه حلو وعشان مكنتش شوفت راجل قبله كنت فاكره أن هو كدة بيحبني وهيحافظ عليا زي ما كان واعدني لكن كل ده محصلش وندمت ندم عمري  ".

كان بيودي بنتي عند أمه عشان بيزهق من زنها 

وأستكملت :" جوزي كان بيحسسني أن بنتي جايباها من الشارع ومكنش بيرضي يصرف عليها ولا يقعد معاها ولا ياخد باله منها وكان طول الوقت بيقولي  " دي جت غلطة عشان انا مكنتش عايزة أخلف منك دلوقتي " لدرجة انها وصلت بيه لما كنت اطلب منه يخلي باله من البنت يوم أجازته عشان هنزل أشتري طلبات وراجعة كنت أرجع البيت الاقي البنت مش موجودة ولما أسأله عليها يقولي " وجعت دماغي بزنها ووديتها عند أمي ".

بعتلي صحابه يضربوني في الشارع عشان سيبتله البيت وعايزني أرجع 

وأختتمت :" جيبت أخري من عمايله وقررت أخد بنتي وأروح علي بيت أهلي وهناك حصل اللي وجع قلبي وحسرني علي نفسي بعد مرور 3 شهور وانا سايباله البيت فيهم وبعد محاولات وأتصالات كتير منه أني أرجع وهو بيقولي " مش قادر علي غيابك وانتي الحاجة الحلوة اللي في حياتي وندمان علي قساوتي معاكي " لكن أنا كنت عارفة ان كل ده كلام في الهوا وأنه عايز خدامه تطبخله وتغسله وتهتم بيه ومش مهم هي إحتياجاتها إية فقررت مردش علي أتصالاته خالص لحد ما في يوم كنت رايحة أزور أختي وأتفاجأت براجلين بيقلعوني طرحتي في الشارع وبيدوني بالمطواة في رقبتي ووشي وبيقولولي " جوزك وصانا عليكي يمكن ترجعي لعقلك وتبطلي عند " من هنا وأنا قررت "أني مش هفضل علي ذمة الراجل ده أكتر من كدة وجيت المحكمة أرفع عليه دعوي خلع عشان مش ضامنة المرة اللي جاية ممكن يعمل فيا أية أكتر من اللي هو عمله  "