لبلبة باكية: أنا مستغربة أني كبرت وبقيت كده

تحدثت الفنانة المصرية لبلبة، عن كواليس تكريمها بجائزة الهرم الذهبي لـ إنجاز العمر في مهرجان القاهرة السينمائي الدولي بدورته الـ 44، فضلًا عن سر استمرار مسيرتها الفنية، وذلك على هامش فعاليات حفل الختام.

تحيا مصر يرصد بكاء لبلبة على هامش فعاليات حفل ختام مهرجان القاهرة السينمائي. 

لبلبة بحفل ختام مهرجان القاهرة السينمائي 

وقالت لبلبة، خلال حوارها مع الإعلامي رامي رضوان في برنامج مساء DMC: كان فيه صدق لما طلعت أقابل الناس ومكنتش مرتبة هقول إيه، واللي حسيته قولته، ولما بدأت أتكلم على والدتي ولقيت الجمهور تأثر وعنيهم دمعت قُلت مش ممكن أسيبهم في دموع على عنيهم، فحبيت أضحكهم فحكيت لما ماما كانت في السينما وحست بوجع الولادة، وقدرت أسيب ليهم ابتسامة، وده مكنش في الحسبان حتى الأستاذ حسين كان بيضحك أوي.

وتابعت: إحساسي لما عرفت إني هتكرم في مهرجان القاهرة السينمائي، كنت مبسوطة أوي لأن قابلوني بشكل جميل جدًا وأنا مش ممكن أنسى أبدًا الأيام الحلوة دي بتاعة المهرجان، وكنت بتمنى نجاح المهرجان، وفعلًا المهرجان نجح والناس كلها مبسوطة ومستوى الأفلام عظيم جدًا وفيه نظام جميل، ويا خسارة المهرجان النهاردة آخر يوم وهيوحشنا.

سر استمرار مسيرة لبلبة الفنية

وأضافت لبلبة: سر استمرار مسيرتي الفنية إني حبيت الفن واتعودت عليه، وخيروني بين إني هكمل ولا لأ وأنا كنت عايزة أكمل، وفيه حاجة عملتها والدتي في سن مُحير كنت 14 سنة وعملت أفلام، ومخلتنيش أبعد عن السينما وخلتني الناس شايفاني باستمرار ومتعودة عليا.

واستطردت: الجمهور رباني وكبرت مع أولاده، أنا مستغربة إن السنين دي كلها عدت بسرعة وكبرت وبقيت كده وأنا كنت طفلة ومش قادرة أتخيل إن السنين دي كلها عدت بسرعة، زي الأم مهما ولادها كبروا بردو بتشوفهم صغيرين.

واختتمت الفنانة لبلبة حديثها قائلة: أنا متأثرة علشان قُلت للأستاذ حسين فهمي، وأنا داخلة إنه هيوحشنا والمهرجان هيوحشنا، كنا متعودين كل يوم نشوف بعض والناس مبسوطة، ولكن خلاص المهرجان خلص، وربنا يدينا العمر ونبقى موجودين في الدورة الـ 45 ونسعد الناس أكتر.