أماني أمام محكمة الأسرة : جوزي كسول ومش بيروح الشغل عشان ميصحاش بدري من النوم

" بيقولي أنا عايز عربية توديني الشغل وترجعني عشان تعبت من المواصلات " بتلك الكلمات روت أماني لتحيا مصر من داخل محكمة الأسرة عن زوجها الكسول الذي سئمت من الحياة معه بعد أن أًصبحت تتولي هي زمام جميع الأمور لبيتها ولأطفالها وأن وجود زوجها أصبح كعدمه حتي قررت رفع عليه دعوي خلع داخل محكمة الأسرة.

تحيا مصر 

جوزي أيام الخطوبة كان بيكسل يقابلني ويقولي تعالي أنتي 

بدأت أماني حديثها لتحيا مصر :" أنا وجوزي متجوزين جواز صالونات عشان أهله يعرفوا أهلي  ولما أتقدملي وافقت عشان أهلي كانوا شايفين أنه مناسب وأنا ملقتش حجة أرفض بيها الجوازة أيام الخطوبة مكنش مدخلني أوي في تفاصيل حياته كنت شايفاه بيشتغل والأمور ماشية معاه كويس لكن الغريب أني كنت بلاحظ أنه مكسل يقابلني لأني كنت ساكنة في منطقة بعيدة عنه جدا وكان يقولي تعالي أنتي وأنا عشان كنت لسة في البداية كنت بوافق وبديله أعذار عشان مخربش علي نفسي  خلال 6 شهور كنا كاتبين كتابنا وبعد الجواز اللي كنت خايفة منه حصل ".

بعد الجواز وزنه زاد ومبقاش بيعمل حاجة غير أنه بياكل وينام 

وتابعت حديثها :" بعد الجواز حملت من أول شهر في ولدين توأم وهو لما خلاص أرتاح من حياة العزوبية وبقي راجل متجوز وكل يوم أعمله الأكل وأنضف مكانه وأكويله لبسه أرتاح علي الأخر وبقي بياكل بكميات رهيبة وينام بعدها بال15 ساعة لحد ما جت فترة بقيت الاحظ أنه مش منتظم في الشغل هو محاسب في شركة وفي الفترة الأخيرة كان بيصحي من النوم بالعافية ولو راح يروح متأخر جدا عن ميعاده أو يأجز وميروحش الشغل خالص وكان دايما يتحايل علي صحابه اللي معاهم عربيات أنهم يعدوا عليه الصبح عشان ميركبش مواصلات لحد ما كلهم زهقوا منه   مديره في الشغل بدأ ينبهه أن عدم الأنتظام ده مش هينفع وهو راح طالب منهم أنه يشتغل من البيت ولما سألته ليه وأية السبب قالي "بصراحة مبقيتش قادر علي الصحيان بدري كل يوم وكمان تعبت من المواصلات اللي بركبها كل يوم عشان معيش عربية ".

بقيت أنا راجل البيت وجوزي ست البيت 

وأختتمت حديثها :" في الوقت ده قررت أشتغل أنا أحتياطا أنه لو ساب الشغل في أي لحظة وهو وافق بكل سهولة وروحت أشتغلت في صالون حريمي وبقيت أنا بصرف علي البيت وواخدة بالي من عيالي أكتر منه لأن هو لما لقاني أشتغلت شال أيده من كل المسؤوليات اللي عليه كراجل وسابهالي أنا لحد ما بقيت انا راجل البيت وهو ست البيت فضلت مستحملاه 3 سنين لحد ما جيبت أخري منه وخوفت عيالي يكبروا ويبقوا شبهه فقررت أجي المحكمة وأرفع عليه دعوي خلع وعوضي عند ربنا ".