خاص| إيمي طلعت زكريا مذيعة في مسرحية كازينو بديعة مع سمية الخشاب

كشفت الفنانة إيمي طلعت زكريا عن طبيعة شخصيتها في مسرحية كازينو بديعة والتي تقوم ببطولتها الفنانة سمية الخشاب، ويتم التحضير لها خلال الفترة المقبلة.

تحيا مصر يرصد لكم شخصية إيمي طلعت زكريا في مسرحية كازينو بديعة

وقالت إيمي في تصريح لموقع  تحيا مصر: شخصيتي في مسرحية كازينو بديعة هتكو مذيعة جوا الكازينو مع الفنان طارق الأبياري، وبيحصل مفارقات كوميدية جوا الدور والمذيعة دي خفيفة وكوميدية وبيحصل أحداث كتير هتعجب الناس.
وتابعت: أحنا لسه حاليًا في البروفات ومش قادرين نحدد معاد عرضها بالظبط  لسه بس أعتقد هتكون في شهر ديسمبر الجاري.

وعن مشاركتها في السباق الرمضاني الموسم المقبل كشفت أنها لم تتعاقد إلى الآن عن مسلسل في رمضان وتنشغل خلال الفترة الحالية بمسلسل عودة البارون ومسرحية كازينو بديعة.

إيمي تعلق على صورة شبيه والدها طلعت زكريا

وكانت إيمي طلعت زكريا قد علقت على الصور المنتشرة لشبيه والدها الفنان طلعت زكريا وقالت في تصريح خاص لموقع تحيا مصر: الصور اتبعتتلي من ناس كتير والراجل مش بيتكلم في حاجة وحشه ومش بيتكلم غير في الكورة وهو مش طالع عشان يقلدوا أو يقول حاجة وحشه العكش هو قدره أنه شبه الفنان طلعت زكريا واتبسطت جدًا لأن الناس رجعت تفتكر الفنان طلعت زكريا واترحمت عليه وبابا دايمًا كان بيطلب أنه لما يموت الناس تترحم عليه، واللي حصل حاجة كويسة ومش وحشة خالص.

إيمي طلعت زكريا تعبر عن اشتياقها لوالدها

كما عبرت إيمي عن اشتياقها الشديد لوالدها الفنان طلعت زكريا وكشفت عن أكثر شئ تفتقده بعد رحيله وقالت: مفتقدة الأب زي اي بنت  بتحتاج لابوها في كل حاجة وفي كل تفاصيل حياتها، وبابا كان قريب مني جدًا وكان صاحبي أكتر من أنه أبويا  ومفتقدة ضحكه وهزاره وكل حاجة كانت معاه، ولو هقوله حاجة هقول أنه واحشني جدًا لكن أنت أكيد في مكان أحسن بكتير.

إيمي تكشف سبب حبها للتمثيل

كما كشفت إيمي عن حبها الشديد للتمثيل ورغبتها في تقديم الأدوار الكوميدية بشكل دائم وقالت: أنا بحب الأدوار الكوميدي زي بابا  كوميديا الطبيعة والتلقائية اللي بنقول عليها السهل الممتنع، أنا بحب الكوميديا اللي مش متكلفه، وهي نفس مدرسة بابا والفنان الكبير سمير غانم الله يرحمه.
وتحدثت إيمي عن حبها الشديد للتمثيل والذي جاء نتيجة والدها الفنان طلعت وزكريا وقالت: بابا حببني في التمثيل وكنت بروح معاه اللوكيشن وقت التصوير، و حبيت التمثيل جدًا وحسيت أنه مش بعيد عليا  ومش مخوفاني خالص بالعكس اطمنت ودخلت المجال.