" مراتي بتجيب زباين للدجالين عشان الفلوس وبقيت أخاف منها " مأساة حسين داخل محكمة الأسرة

"مراتي بتقبض من الدجالين كل شهر وبتضحك علي الستات الغلبانة " بتلك الكلمات روي حسين مأساته من داخل محكمة الأسرة لتحيا مصر عن زوجته التي تتقاضي مبالغ هائلة من الدجالين عن طريق النصب والأحتيال حتى بدأ أن يشعر بالخوف منها .

تحيا مصر

حالنا علي قدنا ومراتي نفسها تبقي غنية 

قال حسين فى مستهل حديثه لـ" تحيا مصر :" أنا ومراتي متجوزين من 5 سنين ولسة ربنا مرزقناش بأطفال وانا شغال في سوبر ماركت بحاسب الزباين الحال معانا مش قد كدة بس مستورة والدنيا بتمشي لكن مراتي دايما بتعترض وتتبطر علي النعمة وتبص للي في أيد غيرها وتعايرني بوضعي وظروفي بدل ما تقف جنبي وتساعدني وخصوصا أننا لسة مجيبناش أطفال وهي بيبقي عندها وقت فراغ كبير تقدر تشتغل وتساعدني فيه زي بقية الستات ما بتعمل لأجوازتهم لكن هي عايزة العيشة المرتاحة اللي متتعبش فيها وبتقولي دايما " أنا مش أقل من اللي بياكلوا أحسن أكل ويلبسوا أحسن لبس " . 

راحت للدجال عشان عايزة تخلف 

وتابع :" مراتي راحت للدجال عشان كانت فاكرة أن حد عاملها عمل أنها متخلفش ومن هنا بدأت الحكاية جت وحكيتلي أنها هتروح وانا قولتلها  دي كلها خرافات ومتسلميش دماغك ليها بس هي برضه عملت اللي في دماغها وراحت ومن هنا بدأت الحكاية بعد ما رجعت من عند الدجال كانت متغيرة وقالتلي أنه أداها فرش ملاية تنام عليه أثناء العلاقة الزوجية وهي هتخلف في نفس الشهر " وهي طبعا صدقت وأنا عشان عارف هي نفسها تخلف قد أيه مكنتش قادر أتكلم معاها ".

بدأت تجيب زباين للدجال وتقبض منه 

وأستكمل :" عدا علي الكلام ده 3 شهور وفي مرة كنت أنا أجازة وقاعد مع مراتي في البيت ولقينا واحدة ست بتصوت وبتصرخ تحت العمارة وبتنده علي مراتي بالأسم وعايزاها تنزلها وأنا طبعا رفضت ان مراتي هي اللي تنزل أحسن تكون ست مجنونة وتعمل فيها حاجة روحت نزلت لها أنا وخدتها علي جنب وعرفت منها اللي صدمني في مراتي وخدعني فيها الست دي حكيتلي وقالت " أنا ووالست مراتك جيران وصحاب واكتر من حبايب ولما كنت بتبقي أنت في الشغل كانت أحيانا هي تجيلي أو أروحلها أنا وفي مرة هي كنت بحكيلها أن جوزي متخانق معايا ومهددني أنه يتجوز عليا راحت قالتلي تعالي أنا هوديكي عند راجل هيحللك مشكلتك مع جوزك وهيخليه ميشوفش حد غيرك روحت معاها والراجل خد مني 30 ألف جنية وانا الحمدلله مستريحة وأديتهم له وهو أداني "أزازة ريحة " احط منها كل يوم وهتخلي جوزي ميعرفش واحدة غيري لكن لمحت وأنا قايمة من عنده انا ومراتك أنه أداها حاجة بس انا مرضيتش أسألها احسن تكون حاجة خاصة بيك أنت وهي وانا دلوقتي أتضحك عليا من الراجل ده هو وومراتك وجوزي ليلة دخلته النهاردة ومش همشي غير لما أخد فلوسي من مراتك ". 

لازم أطلقها أحسن تعملي أنا كمان عمل 

وأختتم :" طلعت لـ مراتي بهدلتها ونزلت فيها ضرب واعترفت لي أنها مش أول ست تضحك عليها وتوديها للدجال ويتشاركوا في الفلوس مع بعض وقالتلي " كنت عايزني أعمل أية يعني انا عايزة أعيش وأنبسط وأنت يادوب بتأكلني بالعافية " رميت عليها يمين الطلاق وماشيين في الأجراءات عشان ست زي دي مش أمان العيشة معاها دي واحدة بتستغل أقرب الناس ليها عشان خاطر نفسها والله أعلم كان ممكن تعمل فيا أنا كمان.