سحر رامي: حسين الإمام ضحك عليا واتجوزني من غير ما يعملي شريط.. ولمدة 30 سنة

تحدثت الفنانة سحر رامي عن قصة الحب التي نشأت بينها وبين زوجها الراحل الفنان حسين الإمام وعن رفضها استخدام كلمة توفى من بعد رحيله.

تحيا مصر يرصد لكم تصريحات سحر رامي

وقالت سحر خلال استضافتها في برنامج كلام الناس الذي تُقدمه الإعلامية ياسمين عز عبر قناة أم بي سي مصر: كنت عاملة إعلان اسمه العقد والشراشيب وكان مكسر مصر ومفيش حد يعرف أنا مين  وحسين شاف الإعلان وهو في بيته وباباه شافني وهو قال لباباه البت دي حلوة انا عايز اتجوزها.

 وتابعت: وفي الوقت ده كنت بعمل مسرحية قسمتي مع الأستاذ فؤاد المهندس على مسرح الزمالك وأولاد فؤاد المهندس كانوا صحاب حسين وقابلهم في النادي وجت سيرة الإعلان وقالهم أنا معجب بيها وهما قالولوا اسمها سحر رامي وبتعمل مع بابا مسرحية وجم مسرح الزمالك وطلعوا في الكواليس وسلكت عليهم و مكنتش اعرفهم وكان جاي مع بابا ومامته وسلموا عليا وحضروا العرض.

واستكملت: وهو جاب رقمي وكلمني وكنت بدأت أعمل  فوازير وهو قالي عندي فرقة وأنا مكنتش أعرفه فعلًا ومعرفش أن فيه فرق وكنت مشغولة في الباليه.

سحر رامي: حسين الإمام طلب مني أشتغل معاه

وأضافت: هو قالي أحنا عايزين نسجل الأغاني بتاعتها نصورها وعايزينك معانا  وانتي هترقصي معانا وبعتلي أوردر رسمي أمضي عليه وكان ساعتها بيعمل مسلسل في استديو  مصر وأداني معاد أروحله هناك وقعدت معاه وشرحلي أعمل إيه وبدأنا نتقابل وأروحله البيت ونتعرف على بعض وكل شوية كان يأجل الشغل اللي بينا وفي الآخر حبينا بعض وأتجوزنا ونسينا نشتغل.

سحر رامي: حسين الإمام ضحك عليا وأتجوزني من غير ما يعملي شريط

وقالت: دايمًا  كنت بقوله أنت ضحكت عليا واتجوزتني ومعملتليش شريط وهو من أول يوم عرض عليا الزواج وقالي تتجوزيني وأنا قولتله أنا مفيش في دماغي الجواز دلوقتي وسكتنا وكلامه وهزاره كان جد وكنت بصدق إي كلام يقوله.

وكشفت: لما اتعرفت عليه وابتدينا نتكلم ونتقابل ونقرب من بعض دماغنا كانت شبه بعض وبدأت أعجب بيه وهو كمان كأن معجب بيا وبأرائي وأنا مكنتش عايزة أغير فيه ولا هو يغير حاجة فيا وأعجبنا ببعض والدماغ كانت واحدة، و أتجوزنا 30 سنة وهو مشي بقاله 8 سنة.