حسام داخل محكمة الأسرة : مراتي بتكلم صحابي الرجالة أكتر ما أنا بكلمهم وبيشتكولي منها

"مراتى بتتصل بصحابي الرجالة كتير وبتقولي أصلي بتطمن عليك منهم" .. بتلك الكلمات روي حسام لتحيا مصر من داخل محكمة الأسرة عن زوجته التي أصبح الشك فيها لا يفارق ذهنه بسبب تصرفاتها الغير لائقة والغير مستحبة مع الرجال أصدقائه .

تحيا مصر

مراتي خدت أرقام كل صحابي الرجالة من ورايا

بدأت الزوج حديثه لتحيا مصر :" أنا ومراتي لسة عرسان جداد بس هي صغيرة في السن عندها 18 سنة وانا عندي 27 سنة بعد الجواز بدات اكتشف تصرفات كتير طايشة منها وكنت بعدي ليها دايما لكن من ضمن التصرفات اللي مقدرتش ورجولتي مسمحتليش أني أعديها هي أني بلاقيها أوقات كتير بتفتح تليفوني من ورايا وولما أدخلعليها بترميه من أيديها في البداية كنت فاكرها بتدور وتشوف أذا كنت بخونها لكن بعد كدة أتضحلي عكس كدة تماما ".

بتكلم صحابي الرجالة وتقولي أنا كنت بسألهم عليك

وتابع الزوج :" في مرة كنت قاعد مع شباب صحابي وتليفون واحد منهم رن وكان رقم غريب ولما رد وعرف أنها مراتي وقالي " ألحق يا حسام دي مراتك بتكلمني  وبتقولي أنها قلقانة عليك وبتكلمك مش بترد " أستغربت وأتصدمت من اللي هو قاله لأن مراتي مكنتش أتصلت بيا أصلا وقتها وفضلت اسأل نفسي هي مراتي جابت رقم صاحبي أزاي أصلا ؟ ولما رجعت البيت ومسكت تليفونها لقيتها مسجلة أرقام كل صحابي الرجالة ووقتها فهمت هي كانت لية بتتخض لما أدخل عليها وهي ماسكة تليفوني ولما واجهتها " الأرقام دي بتعمل أية عندك وبتكلمي صاحبي ليه قبل ما تكلميني أنا ؟ " قالتلي " أنا كملتك ويمكن أتصالي مظهرش عندك وخدت أرقام صحابك عشان لو مردتش عليا أكلمهم هما وأعرف منهم انت فين " .

صحابي كلهم أشتكوا من مراتي وطلعت متعودة

وأختتم حسام :" بعد شوية وقت بدأ حد من صحابي واحد ورا التاني يشتكيلي من مراتي أنها بتكلمه كتير وصحابي كلهم متجوزين وهي كدة ممكن تعملهم مشاكل مع زوجاتهم حقيقي ببقي محرج جدا منهم ومش عارف أقولهم أيه وده خلاني في مرة رميت عليها يمين الطلاق وقولتلها " انتي واحدة مينفعش تكون زوجة لراجل محترم اللي تكلم صحاب جوزها الرجالة وتصغره قدام الناس يبقي خسارة معاها العيشة وأنتي من طريق وانا من طريق " وبعد ما طلقتها عرفت من بعض الأشخاص اللي كانوا مشتركين بيننا أنا وهي أنها كانت برضه قبل ما تتجوزني متعودة تكلم شباب كتير لكن كانوا بيخافوا يحذروني منها عشان كانوا شايفين وحاسين أني كنت متمسك بيها جدا وقتها لكن دلوقتي بقيت أحمد ربنا أني انفصلت عنها ومخلفتش منها كمان أطفال ".