تامر أمين بعد تصريحه "الحشيش معجبنيش": جربت البانجو وروحت البيت بمساعدة أصدقائي

كشف الإعلامي تامر أمين عن تجربته لبعض الممنوعات في فترة شبابه، وتصريحه بذلك بدون خجل وذلك خلال لقائه ببرنامج حبر سري مع الإعلامية أسما إبراهيم.

تحيا مصر يرصد لكم تصريحات تامر أمين في حبر سري 

تامر أمين: جربت البانجو 

وقال تامر أمين عن تجربته للمنوعات أخرى، مختلفة عن تصريحه “جربت الحشيش ومعجبكش”: جربت البانجو، وكانت في نفس الليلة السودا، واحد اداني السجارتين سوا، وأنا قولت ان زمن المراهقة بتبقى عايز تجرب كل حاجة، واحد قالي خد يابني انت كبرت، وقولتلهم ايه الحكمة في اني ابقى قاعد متيس، وروحت البيت بمساعدة أصدقائي.

تامر أمين عن بناته 

وتحدث تامر أمين عن خلفة البنات، ومدى تأثيرها على شخصية الرجل، قائلًا: حصل بحذافيره، عندي بنتين غيروني على المستوى الإنساني، عرفوني يعني ايه رقة الدنيا ودلع الدنيا، وعلى مستوى الرزق، وكل الخير اللي جالي كان مع قدوم البنتين.

وتابع: طول الوقت سعيد بيهم جدًا، وتربيتهم وخلفتهم ألطف عشان الولاد أشقياء، وقولت نفسي في بنت تانية لما مراتي كانت حامل.

تامر أمين يعلق على تصريحه “الراجل المنفسن بعشر ستات”

وعلق تامر أمين خلال الحلقة عن تصريح سابق له “الراجل المنفسن بعشر ستات”، قائلًا: كتير وكلهم ولاد كاري، اللي بيغيروا من نجاحي، والنفسنة درجة قليلة، وربنا يعافينا منهم، وبتجاهلهم، وجزء اساسي من شرهم انهم طول الوقت يلهوكي من الشغل والنجاح.

وعن إحساسه بالغيرة سابقًا، قال: طبعًا غيرت، وغيرت على النجاح وفي فرق بين الغيرة والنفسنة وبقول برافو عليك، مش بحاول اشوهه أو اوقعه.

أزمة تامر أمين وشريف مدكور 

وقال تامر أمين، عن رد شريف دكور عليه “احنا مش صحاب”: انا شوفته كذا مرة، ويمكن مش اصدقاء اوي، بس اتقابلنا في مناسبات عامة، وانا كنت ضيف زميل يوسف الحسيني في الراديو، ولما بكون عايز انتقد او بهاجم حد مبتوصاش.

وتابع تامر أمين: الكلام مكنش في اي تجريح، واقتطاعه على اليوتيوب بوظ الدنيا، وقولت إن من حرفنته بيكون ليه شخصية لوحده، وقولت انه انجح إعلامي في برامج الأسرة والطفل، وكلنا عندنا شخصية في البرنامج، لكن حياتي الخاصة مش هي اللي بطلع فيها على الشاشة.

واختتم تامر أمين: وفي الحلقة دي شكرت فيه، فـ ازاي هيبقى هدفي اجرح فيه، وانا بكنله كل تقدير واحترام، بس ولاد الحلال وصولوا الكلام بطريقة مختلفة.