" جوزي كسر عليا المروحة لما شاف فاتورة الكهرباء " .. سعاد داخل محكمة الأسرة

" تعبت من بخله علينا ولو أبني أشتري حاجة غالية بييجي يضربني أنا حتى على فاتورة الكهرباء" .. جاءت هذه الكلمات على لسان سعاد من داخل محكمة الاسرة عن زوجها الذي تعانى من بخله وعدم أنفاقه عليها وعلي طفلها بالشكل المطلوب حتي قررت رفع دعوي خلع عليه بمحكمة الأسرة مبررة استحالة العشرة معه.

تحيا مصر

جوزي بخيل وعلي قلبه فلوس قد كده 

بدأت سعاد حديثها لتحيا مصر :" أنا متجوزة بقالي 13 سنة وعندي طفل عنده 12 سنة وجوزي شغال كهربائي وبيعرف يكسب فلوس من شغله وعلي قلبه قد كده بس مبيرضاش يدينا كل أحتياجاتنا وخصوصا أحتياجات أبني بحجة أننا كدة هنبقي مبذرين للفلوس وهتطير مننا علي الفاضي مع العلم أني مش بطلب منه غير طلبات للبيت ومصاريف تعليم أبني حتي في الأعياد والمناسبات مبرضاش أطلب منه حاجة عشان مكلفهوش ودايما بتقي ربنا فيا وأحرص أني أحافظ له علي فلوسه بس هو اللي معندهوش دم ومش بيحس بينا ". 

جوزي أداني مرة علقة 

وتابعت :" أبني مرة كان واخد عيدية من خاله في العيد كانوا 200 جنية وراح أشتري بيهم ساعة كان نفسه فيها وصحابه كلهم لابسينها في المدرسة ولما راح لأبوه عشان يوريهاله لما رجع من الشغل مسكني أنا ونزل فيا ضرب وبهدلني عشان مديتلوش فلوس العيدية دي من الأول أساهم بيها في مصاريف البيت فضلت أبكي ومكنتش عارفة أعمل أيه وأقول لأبني أية وأنا من جوايا عارفة أن أبوه بالرغم من أنه معاه فلوس تعيشنا مرتاحين ومع ذلك معيشنا في حرمان وتعب ". 

جوزي شاف فاتورة الكهرباء 

وأختتمت الزوجة حديثها:" كنا قاعدين في مرة والباب خبط وكان محصل الكهرباء هو اللي علي الباب ولما جوزي فتح له وخد منه الفاتوره كانت حوالي 500 جنية بهدلني وصوته كان جايب لأخر الشارع ومسك المروحة وقالي " مش هي دي اللي مشغلاها 24 ساعة أنتي وأبنك " راح شالها وكسرها عليا حتت أبني فضل يبكي من المنظر وتاني يوم علي طول كنت لميت هدومي أنا وأبني وسيبنا له البيت وجيت النهاردةعشان أرفع دعوي خلع عشان بني أدم زي ده حرام أعيش أبني معاه أنا عندي أشتغل وأتعب وأصرف أنا علي أبني ولا أني أخلي أبوه يبقي بيذله باللقمة اللي بياكلها ".