أميرة تطلب الخلع: جوزى شاف صورة ممثل تركي علي تليفوني كسر عضمي وقالي خليه ينفعك

" جوزي أصلع وبكرش بس أنا بحبه وهو اللي معندوش ثقة في نفسه ".. بتلك الكلمات روت أميرة قصتها من أمام محكمة الأسرة عن زوجها الذي يري أن جميع الرجال أجمل منه مما جعل زوجته تنفر من أنعدام ثقته في نفسه وتقرر رفع دعوى خلع  داخل محكمة الأسرة .

تحيا مصر 

بحب المسلسلات التركي من زمان

بدأت أميرة حديثها لتحيا مصر :" أنا وجوزي لسة عرسان جداد وهو عارف أني من زمان ومن قبل ما أتجوزه وأنا بحب أتفرج علي المسلسلات التركي وبحب الممثلين بتوعهم عشان بيبقوا رومانسيين وهو أيام الخطوبة كان الموضوع بنسباله عادي وكان بيقولي أنه هيتفرج معايا علي المسلسلات دي لكن بعد الجواز كل حاجة أتغيرت وبقي بيتعصب في كل مرة يشوفني فيها بتفرج علي مسلسل تركي ويقولي " دي مسلسلات وهمية بتخلي الناس تتبطر علي عيشتها  وملهاش علاقة بالواقع ومتتفرجيش عليهم تاني " وأنا كنت بستغرب ومش ببقي فاهمة ايه اللي بيضايقه كدة منهم لحد ما فهمت بعدين ".

أنا حلوة وجوزي بيخاف مع الوقت

وتابعت :" أنا حلوة وده بشهادة الناس ليا وبحب أهتم بشكلي وبجسمي ودي حاجة من ضمن الحاجات اللي محببة جوزي فيا بس هو عشان أصلع وبكرش بيحس نفسه أقل مني فى الجمال و بيبقي خايف أني مع الوقت أشوفه وحش وأبص لراجل حلو ووسيم مع أني بعمل كل الحاجات اللي تثبتله أني بحبه ومش عايزة حد غيره ".

جوزي شاف صورة ممثل تركي علي تليفوني

وأختتمت :" في مرة كان جوزي بيعمل حاجة علي تليفوني راح لمح صور ممثل تركي علي تليفوني أنا بحبه من صغري وبحب أتفرج علي صوره لكن من جوايا هو مجرد ممثل ومش أكتر من كدة لكن جوزي معداش الموضوع بالساهل ونزل فيا ضرب وقالي " دلوقتي بتتفرجي علي صور ممثل وبكرا الله أعلم هتتفرجي علي صور مين وتمشي معاه " ومن هنا اتأكدت أنه راجل ثقته في نفسه وفيا معدومة ومستحيل أعرف أكمل حياتي معاه وقررت ارفع عليه دعوى خلع ومنتظرة حكم القضاء.