كارمن سليمان: بحب الشهرة.. وأصعب لحظة في حياتي لما جدتي توفت

أكدت المطربة كارمن سليمان على أنها أصبحت الشهرة وتعلمت كيف تجعلها لا تضايقها، وذلك خلال لقائها اليوم ببرنامج “AB TALKS” مع أنس بوخش.

تحيا مصر يرصد تفاصيل تصريحات كارمن سليمان مع أنس بوخش

حيث قالت كارمن سليمان: “بحب الشهرة واتعلمت ازاي مخليهاش تخنقني لأنها كانت بتخنقني، كنت لما بلاقي ناس كتيرة جاية تتصور معايا في أوقات كنت بحس أني اتخنقت لحد ما توصلت لانه انا عادي هخرج وهتفسح في كل الأماكن اللي أنا عايزاها وأي حد هيجي يتصور معايا هقابله بكل ابتسامة مهما كان عندي مشاكل في دماغي”.

كارمن سليمان في “AB TALKS”

ومن ناحية أخرى، أوضحت “كارمن” أنها أحيانا ترى نفسها جميلة، حيث قالت: “أوقات بشوف نفسي جميلة.. أنا عادة مش بحب أتصور خالص بس لما ببقى مبسوطة بدخل على مراية واحط ميكب واصور نفسي بس مش بعمل كدا كتير بس ساعات بحب نفسي بسبب كلام الناس لانه بيأثر فيا جدا”.

وعن أجمل وأصعب لحظة في حياتها قالت كارمن سليمان: “أجمل لحظة في حياتي لحظة وجود زين وأصعب لحظة في حياتس لما جدتي توفت، وساعتها كنت بحمد ربنا أنه محصلناش حاجة وقولنا خلاص الكبيرة راحت ونركز أن مفيش حد مننا تاني يروح”.

علاقة كارمن سليمان بوالديها

وعن علاقتها بوالديها قالت كارمن سليمان: “وعلاقتي مع والدي ووالدتي كانت حلوة.. هما دلوقتي منفصلين من قريب فلما جم خده الخطوة دي وسألونا بالنسبة لاختي فرح كان الموضوع صعب ومكانتش متقبلة الموضوع أوي”.

وأضافت: “وبالنسبالي أنا قولتلهم اتفضلوا، قالولي انتي مش متضايقة قولتلهم عشان انتم مش متفقين، وأنا هما دلوقتي علاقتنا حلوة جدا.. فيه حاجات مع والدتي بنتفق فيها وحاجات كتير لا وأنا ووالدي متفقين دايما”.

صعوبات الزواج في سن مبكر

وعن الزواج في سن مبكر قالت كارمن سليمان: “الزواج في سن بدري خلاني أحس ان فيه حاجات كان لازم أعملها لوحدي زي السفر.. وكل الحاجات اللي معملتهاش قبل الجواز ممكن أعملها دلوقتي بس هحس أن فيه حاجة ورايا بردو”.

وأضافت: “لا أؤيد الزواج في السن المبكر وممكن أؤيده بداية من سن 27 للمرأة لانه فيه تجارب كتير مش هتدخل فيها والراجل مش قبل 30 سنة ومصطفى جوزي اكبر مني ب 10 سنين”.