فاطمة أمام محكمة الأسرة : ضرتي وحماتي عملولي سحر وكنت بستخبي من جوزى على السطوح

" حالي وقف بعد الطلاق ومش بيجيلي عرسان بسبب السحر والعمل اللي بتعمله ضرتي وحماتي ليا كل شهر".. جاءت هذه الكلمات على لسان فاطمة من داخل جدارن محكمة الأسرة وهى تقص مأساتها مع جوزها السابق وضرتها ووالدته التى كانت تتعدى عليها بالضرب والإهانة وجعلت زوجها يتزوج عليها من أخرى لتعيش فى عالم السحر من ضرتها وتحرم من أولادها .

تحيا مصر

كنت بستخبي من جوزي فوق السطوح 

بدأت فاطمة حديثها لتحيا مصر :" حياتى معاه كانت عذاب وربنا كرمنا بـ 3 أطفال ولدين وبنت صغيرة وأكبر ولد فيهم عنده 15 سنة جوزي معاه ميكروباص شغال عليه سواق عيشت معاه في عذاب وأهانة وضرب منه ومن أمه اللي كانت بتكرهني عشان مش عايشالها خدامة تحت رجليها زي ما هي عايزة وعشان كنت بخدم عيالي وجوزي أكتر منها خربت علينا حياتنا وكرهته فيا بعد ما كان بيحبني كانت بتمسكني تضربني بالأقلام في الشارع وتسخنه هو كمان عليا عشان يضربني وتقوله " طفشها وهجوزك ست ستها " وبالفعل كان بيضربني كتير لدرجة أني كنت بستخبي منه في السطوح عشان ميشوفنيش ولما أطمن أنه نزل الشغل أنزل أنا شقتي عادي " 

 ضرتي في بيتي ونايمة علي سريري

وتابعت :" كل ده وانا كنت ساكتة ومستحملة ومش عايزة أطلق والمحاكم عشان خاطر مخربش بيتي وأحرم ولادي من أبوهم فقولت هسيب البيت يومين وأروح لبيت أهلي لحد ما الأمور تهدا ولما رجعت أتفاجأت أن جوزي كاتب كتابه علي واحدة ومعيشها في بيتي ومنيمها علي سريري وحماتي بتعاملها أحسن معاملة ففهمت أن هي اللي جايباهاله عشان يطفشوني ويحلالهم الجو مع بعض هما التلاتة ". 

رفع دعوى نفقة 

وأختتمت :" بعد ما عرفت أن جوزي أتجوز عليا روحت عملت فيه دعوي طلاق للضرر والمحكمة هي اللي طلقتني منه وهو عشان يلوي دراعي خد مني عيالي وحرمني منهم وكرههم فيا وعيشهم مع مراته التانية كل اللي أنا فيه ده عمل وسحر معمولي من حماتي وضرتي وبيجددوه كل شهر عند الشيخ عشان جوزي يشوفني وحشة ويشوفها هي اللي حلوة وعشان يتوقف حالي بعد الطلاق ومتجوزش تاني وبالرغم من أن بيجيلي عرسان كتير بس مفيش عريس بيكمل معايا للأخر بس أنا مش هعمل زيهم والجأ للدجالين أنا هسيبها علي ربنا هو اللي هيجيبلي حقي منهم وحسبي الله ونعم الوكيل فيهم والنهاردة جاية عشان ارفع دعوى نفقة ومنتظرة حكم المحكمة "