ياسمين سمير: شخصية روزاليوسف فيها حاجات صعبة للممثل.. وعمرو عبد الجليل مش بيفكر في نفسه قد ما بيفكر في اللي حواليه| حوار

ياسمين سمير.. فنانة شابة استطاعت أن تخطف أنظار وقلوب الجمهور بملامحها الملائكية البريئة، وبأدائها التمثيل المتميز في العديد من الأعمال الفنية الناجحة، والتي منها: مسرحية “اللوكاندا”، مسلسل “سوشيال”، مسلسل “الحرير المخملي”، حكاية “بالورقة والقلم”، ومؤخرًا مسلسل “الضاحك الباكي".

أجرى موقع تحيا مصر معها حوارًا خاصًا لتكشف لنا عن تفاصيل شخصيتها في مسلسل “الضاحك الباكي”، والصعوبات التي واجهتها به، والكثير من الأمور الأخرى.

وإليكم نص الحوار:

ما الذي حمسك للمشاركة في مسلسل “الضاحك الباكي”؟

اللي حمسني للمشاركة في الضاحك الباكي هو طبعا أنه سيرة ذاتية عن نجم كبير أثر في أفلامنا وأثر فينا كلنا وهو فخر للوطن العربي مش بس لمصر وهو النجم نجيب الريحاني.. وكمان اسم أستاذ محمد فاضل.. وطبعا واحدة من جيلي متعاملتش مع جيل أستاذ محمد فاضل، جيل الكبار بتوع الدراما، فكان لازم طبعا أشارك وأنا مغمضة.

هل كان لديك تخوف من تجسيد شخصية حقيقية ضمن أحداث “الضاحك الباكي”؟

كان عندي تخوف من تجسيد شخصية حقيقية خصوصا أن دي تعتبر أول مرة أعمل فيها دا.. بس بردو اللي سهل عليا الموضوع أن روزاليوسف ملهاش حاجات وهي صغيرة يعني مش محفورة في أذهان الناس زي نجيب الريحاني أو استيفان روستي والناس مش عارفاها أوي كشخصية قد ما هما عارفينها كشخصية صحفية واللي الناس متعرفوش عنها أن هي كانت ملقبة بسارة جرنال العرب وكانت ممثلة هايلة.

أيهما الأصعب بالنسبة لكِ، تجسيد شخصية حقيقية أم شخصية من خيال المؤلف؟

بالنسبالي تجسيد شخصية خيالية من خيال المؤلف دي أسهل من الشخصية الحقيقية، لأن الشخصية الحقيقية بتحتاج جزء من التقمص لو هي معروفة عند الناس زي جمال عبد الناصر لما قام بيه أحمد زكي.

ما الاستعدادات التي قومتي بها لتتمكني من الشخصية أكبر قدر ممكن؟

قريت مذكرات روزاليوسف، شوفت هي بتوصف المرحلة دي ازاي هي كاتبة نص مذكراتها عن الفن والنص التاني عن الصحافة، فالنص بتاع الفن ملم بحاجات كتير أوي زي علاقتها بالناس وهي شايفة كل الناس عاملة ازاي ورؤيتها فيهم ايه ومنهم نجيب الريحاني اللي كان صديق مقرب ليها.

ما هو أصعب أمر واجهك في المسلسل؟

أصعب حاجة واجهتها في المسلسل هي أني أول مرة أعمل شخصية حقيقية موجودة في الواقع، بالإضافة إلى أن الشخصية فيها انفعالات ودماغها ناشفة وعنيدة، وشخصية روزاليوسف فيها حاجات كتير صعبة للممثل.

حدثينا عن التعاون بينك وبين النجم عمرو عبد الجليل

أستاذ عمرو عبد الجليل حد جميل أوي محترم جدا، وهو نجم في اللوكيشن واخد باله من كل الناس، يعني ممكن تلاقيه قاعد مش بيفكر في نفسه قد ما بيفكر في اللي حواليه، وهو حد متعاون أوي.

ما رأيك في الانتقادات التي وجهت لـ مسلسل “الضاحك الباكي”؟

المسلسل عمل فني.. وطالما عمل حراك في الشارع وعمل حراك على مستوى النقد فأنا شايفة أن دي حاجة صحية.. وإن المسلسل الحمد لله متشاف سواء الناس اختلفت عليه أو تقبلته أو رفضته دي حاجة صحية وهو دا الفن، الفن مش معمول عشان كلنا نقول أه دا جميل، أه دا هايل لا، الفن معمول عشام خاطر نجادل ونتناقش ونتكلم وننقد، ويمس حاجة فينا أو ننفر من حاجة فينا.

حدثينا عن شخصيتك في مسلسل “العيلة دي” مع وفاء عامر

بجسد في مسلسل “العيلة دي” شخصية مروة بنت أخت مدام وفاء عامر اللي قايمة بدورها سلوى عثمان، والمسلسل بيتكلم عن العيلة المصرية بمختلف الطبقات والديانات في إطار لايت كوميدي.

هل توجد شخصية معينة تتمني تجسيدها في المستقبل؟

أنا لسه مقدمتش حاجة.. لسه في بداية مشواري فأنا عايزة أقدم كل حاجة.. عندي شراهة أني أعمل كل حاجة.. الكوميدي والتراجيدي والشرير واللاأخلاقي والأخلاقي.

هل توجد أدوار معينة ترفضي تقديمها ؟

مفيش أدوار معينة برفضها بعينها، بس بيبقى فيه مقاييس معينة عشان أقبل الدور زي الورق والكرو اللي هشتغل وسطيه ومخرج استفيد منه وشركة إنتاج محترمة، دي حاجات كلها لازم تبقى متوفرة، ودا عندي أهم من مساحة الدور.

هل توجد أعمال جديدة تحضرين لها في الفترة القادمة؟

أنا حاليًا بصور في “الضاحك الباكي” و"العيلة دي" فاخلصهم على خير وإن شاء الله يبقى فيه حاجة جاية لشهر رمضان.