نهاد تطلب الخلع : جوزى ضربنى وغضبنى عند أهلى عشان خلصت كيس صابون على غسيل البطانية

" بخيل لدرجة استحالة إنسان يعيش معه لو يوم واحد وبيحب نفسي وأنانى بشكل غريب كل حاجة يشوفها قبل ما يخرج وبعد ما يخرج ولو اكتشف انى خلصت حاجة قبل معيادها اللى محددة ليا أو اكلت رغيف زيادة يبقي يوم اسود عليا، كيس صابون ب 10 جنية غسلت بيه البطانية ورجع من الشغل يبص لقيه خلص ضربنى وحلف انى مش هقعد فى البيت ثانية واحدة لأنى اللى زى ما بعرفش المسئولية " جاءت هذه الكلمات على لسان نهاد وهى داخل محكمة شمال الجيزة لرفع دعوى خلع من زوجها مبررة استحالة العشرة بينهما بعد كل ما تحملته.

تحيا مصر 

وقالت نهاد فى حديثها مع " تحيا مصر “، لما اتخطبت حسيت أنه بخيل وقولت لوالدتى اللى من طيبتها دافعت عنه وقالت أنه شاب ومحتاج كل مليم وقرش عشان يجهز نفسه، وأنه بعد الجواز استحالة الراجل يبخل على مراته، وأنا أقنعت نفسي بكلامها، ومكنتش بطلب منه اى طلب أبدا فى فترة الخطوبة زى البنات، واتجوزنا بعد 5 شهور فقط من فترة الخطوبة، ودا لأنى والدى كان مسافر وتممنا الفرح قبل ما يمشي، ومكنتش أعرف اللى مستخبي ليا ” .

دعوى الخلع بمحكمة الأسرة 

وتابعت الزوجة حديثها فى دعوى الخلع التى أقامتها بمحكمة الأسرة ، " واتفاجت بعد الجواز أنه قبل ما ينزل أو ينام أو يصحى أو يرجع من بدره لازم يشوف كل حاجة فى البيت الخزين والأرز والتلاجة والأكل والعيش ويحدد استخدامى من كل حاجة لو رجع لاقي حاجة ناقصة يزعق ويتخانق وكنت بخوف منه جدا لحد ما يوم قررت اغسل البطانية واخدت كيس صابون ب 10 جنيه،  ومتوقعتش أنه ممكن يتخانق بعد ما يشوف البطانية اللى اتغسلت ولكن زعق وشتمنى وأهانى أنا وأهلى لحد ما طفح بي الكيل وقررت أرد عليه فضربنى وحلف ما أنا قاعدة فى البيت، ولما طلبت منه الطلاق طلب منى أتنازل عن كل حقوقي فرفضت فقررت ارفع دعوى الخلع بمحكمة الأسرة عشان مافيش إنسان على وجه الأرض يقدر يعيش معاه ومازالت الدعوى منظورة بمحكمة الأسرة .