تامر فرج: ممكن أمثل من غير ما أتلزق في مهرجانات ولا اعتزل

أعرب الفنان تامر فرج عن استيائه الشديد من قلة مشاركته في الأعمال الدرامية والسينمائية، وطلب من القائمين على صناعة الفن بالرد عليه.

تحيا مصر يرصد لكم استياء تامر فرج من قلة أعماله الفنية.

وكتب تامر بوست عبر حسابه بموقع التواصل الاجتماعي فيسبوك عبر فيه عن استيائه الشديد وقال: البوست ده مش حالة اكتئاب ولا يأس ولا انهزاميه خالص..هو مجموعة أسئله أرجو أنها توصل للقائمين على صناعة الدراما والسينما والفن فى البلد وبره البلد وحد يتكرم مشكورا بالرد عليها.

وتابع: الحمدلله الناس كلها بتقولى أن أنا موهوب وعندي كاريزما ومش عارف إيه وبيحيوني على أدائي و تمثيلي وشواهد كتير بتقول أنى بعرف أمثل.

واستكمل: واللى يقهر السؤال اللى مش عارف ليه بيتوجهلى انا لما بيقولولى انت ليه مقل فى أعمالك؟؟ ده احنا بننتظر مشاهدك و شغلك.. أو أنت ليه ما بتعملش سينما؟؟ أو انت ازاى مابتاخدش مساحات اكبر من كده؟؟؟زى ما يكون انا اللى مابشتغلش بمزاجى.

تامر فرج: ممكن أمثل من غير ما اتلزق في المهرجانات

وطرح تامر فرج عدد من الأسئلة على المنتجين والمخرجين في مصر وقال: أنا اسمى تامر فرج ممثل و سيناريست هل ممكن امثل او اكتب عشان انا موهوب فقط مش عشان عندى عدد فولورز كتير على السوشال ميديا.. هل ممكن امثل أو أكتب بموهبتى وانا راجل مابحبش اتنطت فى خروجات وكافيهات و سهرات وتجمعات وبفضل إني اقعد في بيتي مع اسرتى اكتب وأشتغل على نفسي فى التمثيل؟

واردف: هل ممكن أمثل أو أكتب بموهبتى من غير ما أتلزق فى مهرجانات و حفلات لأنى مابحبش اروح أي حدث فني غير لما اكون معزوم بجد و مرغوب فى وجودى ؟.. هل ممكن امثل او اكتب بموهبتى من غير ما اقعد استعرض نفسى و صورى على الانستجرام و اكتب صباح الخير و جمعه مباركه و ايه رأيكم فى اللوك الجديد او افضل اسوق نفسى بصورى فى الجيم وانا اتصبب عرقا و افرز عضلات من كل حته فى جسمى؟

وأضاف: هل ممكن أمثل أو أكتب بموهبتى من غير ما اسوق لنفسى على السوشال ميديا بستوريز تافهه أو تريندات هايفه لأنى رافض فكرة تسويقى كسلعه على السوشال ميديا رغم انى عارف أن دلوقتى التواجد بالشكل ده ولو بصوره عبيطه او اخبار  حراقه عنى وعن اهل بيتى هو الباب المفتوح للشهره والحل الوحيد للتواجد عشان المنتجين والمخرجين يفتكرونى، لكن انا للأسف ماتربيتش كده واتربيت على احترام اهل بيتى وانى اشتغل بموهبتى مش بتواجدى وخلاص، و يوم ما هستخدم السوشال ميديا هستخدمها لنشر الوعى وتقديم محتوى مش عشان اسوق لنفسى، هل ممكن اتعرف بشغلى ولا لازم اتعرف بالسوشال ميديا؟؟؟

تامر فرج: ممكن أمثل بموهبتى مش عشان أنا من شلة فلان

واستكمل: هل ممكن امثل او اكتب بموهبتى مش عشان انا من شلة فلان او صاحب فلان؟؟؟ مع العلم ان الوسط كله اصحابى لكن انا مابعرفش افضل ابعت للمخرج فلان و المنتج علان تحياتى و سلاماتى و بوستات عيدكم مبارك و صباح الرضا و مع العلم ان اخويا المخرج العبقري استاذ وائل فرج و مع ذلك مابيقدرش يجيبنى فى اعماله احيانا لأن جهة الانتاج مش موافقه!!!

وأستطرد: هل ممكن المنتجين والمخرجين يتفرجوا على شغلى فيجيبونى مش اترفض او اتقبل على هوى الكاستنج دايركتور؟.. هل ممكن امثل عشان انا ممثل كويس او كتاباتى توصل عشان انا بكتب كويس مش عشان فى واحد اياكان هو مين انا مش عاجبه او عشان هو مكتفى باللى يعرفه ومش عايز يجرب اللى مايعرفوش؟.

وأختتم: أسف للإطاله لكن عندى اسئله كتير و الوضع غير مفهوم والناس كلها اللى فى الوسط بتقول احنا مش فاهمين ايه اللى بيحصل و ايه السيستم!!.

تامر فرج يوجه أسئلة لمنتجي ومخرجي مصر

وتسأل تامر فرج:يا جماعه ايه السيستم؟؟؟ الدنيا بتمشى ازاى؟.. مش عايز ردود تعاطف واللى عايز فعلا يساعدنى يساعد ان البوست ده يوصل او يمنشن حد من الوسط يكون عنده إجابات...انا عايز إجابات.. فين السيستم؟ولا نعتزل و نشوف حاجه تانيه؟.