دياب: غنيت عشان مكنش معايا فلوس.. ودايما بقول أني شغال عند الناس

كشف الفنان دياب عن تفاصيل بداياته الفنية في مجال الغناء، حيث أوضح أنه بدأ كمطرب وهو في سن الـ 15 لحاجته المادية آنذاك.

تحيا مصر يرصد تفاصيل بداية الفنان دياب الفنية في الغناء

حيث قال دياب أثناء حواره اليوم ببرنامج “أسرار النجوم” مع المذيعة إنجي علي: “أنا بغني من وأنا عندي 15 سنة وأنا من منطقة شعبية في إمبابة وأهلي ناس شعبيين وكنت بحفظ أغاني الذكر، ومكنتش واخد الموضوع كموهبة وعايز اتقلها.. أنا غنيت عشان مش معايا فلوس”.

تفاصيل بداية دياب الفنية

وتابع دياب في حديثه قائلًا: “وأنا أصلا كنت بلعب كورة وبحبها بس ملقيتش طريقي فيها فبعدت عنها بس غنيت لكسب الرزق ومكنش معانا فلوس وظروفنا وحشة، وفي أحد الأفراح شخص قدمني عشان أغني والناس حبوا اللي قدمتوا”.

واستطرد: "وجالي شخص وقالي هديك 45 جنيه في فرح وفرحت جدا وقتها، والرقم كان بالنسبة لي ثروة طائلة، وكل الحاجات دي أثرت في تكويني، وطبعا فيه أشخاص عايزين يهربوا من الماضي ولكن أنا بحب الماضي بتاعي بالأبيض والأسود اللي فيه لأن هو ما شكلني وصنعني، ودايما على اتصال بأصحابي في إمبابة، ولكن التنصل من ماضيك هو قلة ثقة في النفس لأن ماضيك أنت مصنعتوش”.

دياب والجمهور

ومن ناحية أخرى، أكد الفنان دياب على أن المعيار الذي يحدد نجاحه بالنسبة له هو الجمهور، حيث قال اليوم لـ برنامج “أسرار النجوم”: “دايما بقول أني شغال عند الناس والناس هي اللي بتصرف عليا وبتشحن ليا التليفون، ولولا محبتهم مكنتش هبقى موجود وهما اللي بيحددوا حجمي وقيمتي وموجود فين على الخريطة في الشغلانة اللي بشتغلها، والناس معندهاش أهواء، والناس هما أصدق ترمومتر وهما يحددوا حجمي وقيمتي من خلال نقدهم الإيجابي أو السلبي”.

أخر أعمال دياب

ومن الجدير بالذكر أن أخر أعمال دياب مسلسل “المتهمة” الذي تم طرحه عبر منصة “شاهد” الإلكترونية، ودارت أحداث المسلسل في إطار درامي تشويقي حول امرأة تجد نفسها متهمة بجريمة قتل لا تذكر عنها أي شيء، تكرس حياتها لمهمة العثور على المجرم الحقيقي وإثبات براءتها.