عزة بهاء عن دورها في "الواد سيد الشغال": الإفيه اللي قولته كان مكتوب.. وأي حد جنب الزعيم بينور

تحدثت الفنانة عزة بهاء عن مشاركتها في مسرحية الواد سيد الشغال، وذلك خلال لقائها ببرنامج كلام الناس، مع الإعلامية ياسمين عز.

تحيا مصر يرصد لكم كشف عزة بهاء عن كواليس مشاركتها في مسرحية “الواد سيد الشغال”

"أنت شديد أوي مع الموظفين بتوعك يا سيد بيه"

وقالت عزة بهاء: الإفيه كان مكتوب في الاسكريبت لكن إن عادل إمام يمسكني من مناخيري ويرقص بيا مكنش مكتوب، وأي حد جنب الزعيم عادل إمام بينور، والدور ده مكنش دوري كان لبنت بس حصلها ظروف.

وتابعت عزة بهاء: كنت في الكواليس بشوف استاذ عادل بيعدي بس الناس بتضحك، وكنت بقول انا هدخل اعمل ايه وبنسى الكلام، واستاذ عادل كان بيطمني لحد ماتعودت، ومرة دخلت قولتله همشي بدري عشان ماشية مع صحابي، قالي يا عزة التحية جزء من العمل وكان في أسس وتعليم.

عزة بهاء عن دور والدتها رجاء سراج في المسرحية 

وعن تسريحة شعر وملابس والدتها الراحلة رجاء سراج في المسرحية، قالت: لبس ماما كان اتفاق بينهم من قبل ما يشتغلوا.

وأضافت: طول ما ماما كانت موجودة كنت مهتمة بشغلي أكتر، وكانت شايفة روحها فيا ومشجعاني ودايمًا تقولي مترفضيش أي عمل عشان ده رزق وكانت بتسندني جامد.

عزة بهاء عن والدتها: عديت بفترة صعبة بعد وفاتها 

وقالت عن والدتها: كنت مرتبطة بوالدتي جدًا وقريبة ليها، لما اتوفت عديت بفترة صعبة، وحضرت أول جوازي ونصحتني وطلع كلامها صح.

وأردفت كاشفة رفض والدها دخولها الفن: بابا مهند بترول ومكنش موافق على دخولي الوسط، ولما لقا أعمالي بشكل معين بقى يقولي أنتي كويسة.

عزة بهاء عن سبب ابتعادها عن التمثيل: “البيت خدني”

وعن سبب غيابها عن التمثيل، قالت: أنا بشتغل بس قليل، مبحبش أعمل أي حاجة والبيت خدني شوية كتير من 20 سنة، وكنت بنزل اشتغل بس قليل، ومش كل الشغل اللي كان بيجيلي ببقى مبسوطة بيه، والبيت خدني بمزاجي.

وعن حصرها في أدوار الهوانم، قالت: حصروني في الأدوار دي، والشخصية الوحيدة اللي خرجت فيها عن الدور ده في مسلسل الليل وأخره، وكنت ببقى مضايقة وبقولهم الفنان بيعمل كل الأدوار وبعد شوية لاقيت إن دي شغلة المخرج.