علاء مرسي: صورت عمل فني في المقابر.. وشائعات وفاتي حاجة مزعجة

صرح الفنان علاء مرسي عن تعرضه لموقف مخيف أثناء تصويره بإحدى المقابر، وأثر الشائعات على أسرته، وذلك خلال لقائه ببرنامج واحد من الناس مع عمرو الليثي.

تحيا مصر يرصد لكم تصريحات علاء مرسي عن موقف تصويره في المقابر وشائعات وفاته 

علاء مرسي عن شائعات وفاته: “حاجة مزعجة”

وقال علاء مرسي: الإشاعات سخيفة وبتخض، وبنتي كلمتني في مرة وأنا برا مصر وكانت مخضوضة، والخبر ده مزعج جدًا للأهل.

وعن تعامله مع التعليقات السلبية، قال: الكومنتات القاسية دلوقتي بشتمهم، والسوشيال هي نعمة لكن الشباب خدوها غلط، وأنا مبهتمش بيها.

علاء مرسي يصور في المقابر

وحكى موقف تصويره في المقابر، قائلًا: دخلت مقبرة حقيقه الساعة 12 بالليل أنا ومحمد رياض، وسابوني وكانوا مفهميني إن المقبرة نضيفة وحطولي كاميرا في عين.

وأضاف: أنا مبخافش بس بخاف، يعني مش لدرجة إنك تقفل عليا التربة والدنيا ضلمة، فضلت اقولهم يا جماعة يلا، فجأة لاقيت واحد بيقول ايوه ياستاذ علاء ساعتها صرخت صرخة وجريت.

علاء مرسي يكشف قصة حبه لزوجته 

وبخصوص قصة حبه مع زوجته قال علاء مرسي: اتجوزت مراتي عن حب، لأني بحب الحب، ولما قابلتها كانت خريجة معهد موسيقى بس مكنتش عايزة تشتغل في هذا المجال، وروحت بيها لأمي قولتلها أنا بحبها وهتجوزها.

وعن حقيقة تصريحاته بخيانة زوجته، قال: أنا بحب الستات جدًا، لكن مقدرش اخونها عشان هتضرب علقة ما يعلم بيها إلا ربنا، وأنا مريض بأمي عشان كده أي ست بتاخدني، ومدخلتش في معاصي وبحب الحب المطلق.

وتابع علاء مرسي: أنا كنت بقول لمراتي كل حاجة، وهي ست فضلت في ضهري، وعايز أقولها أنا بحبك جدًا وأنا عارف منزلتي عندك، وبقولك سامحيني على أي خطأ.

علاء مرسي: قصرت مع أسرتي

وعبر علاء مرسي عن حزنه الشديد بسبب تقصيره مع أسرته، قائلًا: مكنتش بفسح ولادي ولا زوجتي حتى لو فاضي، عشان أنا قليل الخروج وبحكم مهنتي بعدت عن الأسرة إني أقوم بالواجب على أكمل وجه.

وتابع عن رفضه لأدوار الشرف، قائلًا: قولت مش هعمل ضيف شرف تاني، وكنت بروح عشان اقفل مع صحابي ومبياخدوش فلوس، وفي أعمال كتير اشتغلتها ببلاش حتى لو محتاج فلوس.