أبو الليف لـ نقيب الموسيقيين القادم: “محتاجين نزود المعاشات.. 450 جنيه مبيعملوش حاجة”

خرج المطرب نادر أبو الليف، ليدلي بصوته في انتخابات نقابة المهن الموسيقية، التي انعقدت اليوم الثلاثاء الموافق 11 من شهر أكتوبر، معلنا عن طلباته من النقيب الجديد.

تحيا مصر يرصد في ذلك التقرير طلبات أبو الليف من النقيب الجديد

أبو الليف: يهمنا مصلحة النقابة وعايزين المعاشات تزيد

قال أبو الليف في تصريح خاص لـ موقع تحيا مصر، كاشفا عن طلباته من النقيب الجديد: “الجو حول وإحنا كلنا هنا واحد، ويهمنا مصلحة النقابة، وبطلب من النقيب الجديد إن المعاشات تزيد لان حرام اكون عضو عامل بقالي كذا سنة واخدلي 450 جنيه هعمل بيهم اي مش هيكفوني فول في اليوم ولوحدي”.

وتابع: "تخيل اما يبقى عندي 3 عيال وامهم وايجار بيت وغيرهم الـ 450 هيعملوا اي والـ 1000 هيعملوا اي.. محتاجينه كمان يظبط التأمين الصحي لـ أعضاء الجمعية العمومية، وربنا يولي من يصلح".

مطالبات نجوم الغناء لـ النقيب الجديد

جدير بالذكر، أنه ناشد عدد كبير من نجوم الغناء على هامش انتخابات نقابة المهن الموسيقية بالإهتمام بالموسيقيين، فقال عبد الباسط حمودة: “في غيري مش لاقي ياكل، وممنوع المطرب يطلع بدون موسيقي، الموسيقى ده ربنا خلقه ليه عشان يقعد فيه بيته، هنختار اللي هيحترمنا وهيمنع الكلام الخارج  ويشغل اللي قاعدين في البيت ويشوف مطالبنا هو اللي هننتخبه.. ومش عايزين حد يقعد في بيته وميردش علينا”.

بينما قال محمود الليثي: “ربنا يوفقك الجميع، بس أهم حاجة عندنا الراجل الموسيقي، وأنا مشكلتي كلها الموسيقي، نشوف طلباته وبس.. مش عايزين حاجة غير غير اننا نشوف الموسيقي عايز اي، أنا معايا 72 واحد وسعد معاه 60، وعبد السلام معاه 50، محتاجين نشوف طلبات الناس دي، احنا في دولة قانون مش ضد حد خالص وربنا يولي من يصلح”.

جواهر: “ياريت تعامل الناس بانسانية وكـ بشر”

في حين قالت المطربة جواهر: “قول للنقيب اللي جاي بلاش نهاجم الناس، واللي بيغني مهرجانات نجيبه ونقوله لا غير الكلمات دي ونصلحها، لازم نعامل الناس كـ بشر، ربنا معاك المهمة صعب جدا خاصة السنة دي..وخلي بالك من الموسيقين شوية وياريت نزود لليهم المعاشات شوية لانهم تعبانين جدا جدا”.