نادية شكري: والدي خاصمني عشان أصريت أتجوز سامي العدل.. وأحمد زكي ضربني مرة بالقلم

أوضحت الفنانة القديرة نادية شكري أن والدها قاطعها لفترة بسبب إصرارها على الزواج من الفنان سامي العدل، مشيرة إلى أنه رفض أن يزوجها له بسبب “شقاوته”.

تحيا مصر يرصد تفاصيل تصريحات نادية شكري عن والدها وأحمد زكي

حيث قالت في حوارها مساء يوم الإثنين ببرنامج “واحد من الناس”: “كنت متخاصمة مع والدي عشان مكنش عايزني أخليني أتجوز وأنا أصريت، وهو كان مدلعني أوي ومكنش يتخيل أن أنا ممكن أتجوز أي حد وكان شايفلي صورة غريبة في خياله زي أي أب”.

وتابعت: “وأنا أصريت أني أتجوز سامي العدل الله يرحمه، وكان باباه صاحب بابا، وكانت المشكلة في شقاوته، يعني كان بابا بيعرف شقاوته من بابا، فدا كان سبب رفضه الأساسي، بس اتجوزت ومسمعتش كلامه فخاصمني وقاطعني، واتصالحنا في مسرحية العيال كبرت”.

كواليس مسرحية “العيال كبرت”

وفي الحلقة ذاتها كشفت الفنانة نادية شكري عن مواقف عديدة حدثت أثناء عرض مسرحية “العيال كبرت”، حيث روت موقف جمعها بالراحل سعيد صالح، فقالت: “في مرة دخلت صالة المسرح وكان فيه ضيف مش مصري قاعد قدامي وابتدى يعاكسني وأنا الحكاية دي ضايقتني جدا”.

واستطردت: “واتوترت وبعدين طلعت لسعيد قولتله في واحد قاعد في أول صف بيعمل حركات مش لذيذة ومش عارفة اعمل ايه راح قالي سيبك انتي منه وأنا طالعله، قطاع بمنتهى الجرأة وبعدين هزقه قدام الجمهور كله ووقفوا الصالة وطلعوا الراجل ده برا”.

ضرب أحمد زكي لـ نادية شكري بالقلم

كما روت موقف طريف جمعها بالنجم الراحل أحمد زكي ضمن كواليس مسرحية “العيال كبرت”، حيث قالت لـ برنامج “واحد من الناس”: “أحمد زكي مرة ضربني بالقلم وعيطت، هو كان جاي يهزر معايا، أنا كنت قاعدة بعمل ميكب وكنا بنشاغب بعض بقالنا كام يوم فجه وقالي ازيك عاملة ايه”.

وتابعت: “فقولتله الحمد لله يا أحمد قالي ايه الحمد لله دي بتقلبيني ولا ايه قولتله لا بكلمك عادي، وفجأة اتدورت كدا راح لاطشني قلم.. وأنا استغربت جدا وعيطت، وراح قالي اتصدقي انتي قمر وانتي بتعيطي فموت من الضحك ونسيب القلم”.