شيرين عبد الوهاب عن مشاركتها بمهرجان قرطاج: عيطت أنا ومدير أعمالي بعد الحفلة لهذا السبب

علقت الفنانة شيرين عبد الوهاب على مشاركتها في مهرجان قرطاج بالرغم من مرورها بظروف صحية ونفسية سيئة، وذلك خلال لقائها ببرنامج صاحبة السعادة مع إسعاد يونس.

تحيا مصر يرصد لكم تصريحات شيرين عبد الوهاب عن حفلها بمهرجان قرطاج

بكاء شيرين عبد الوهاب ومدير أعمالها بعد حفل قرطاج

وقالت شيرين عبد الوهاب عن مشاركتها في مهرجان قرطاج: صحيًا مكنتش قادرة اغني مش نفسيًا بس، وأول مرة اشوف نفسي عرقانة كده على المسرح، كلمني سيادة السفير المصري في تونس وقالي عايزينك قولتله ماشي معرفش ازاي، مكنتش اقدر اقف ساعتين اغني، واول مرة يبقى في 4 كراسي على المسرح عشان لو تعبت اقعد، وكنا بنعيط أنا ومدير أعمالي بعد المسرح عشان مكنش في صوت بيطلع.

وتابعت شيرين عبد الوهاب: لما طلعت على المسرح غمضت عيني وخوفت ولما لاقيت طاقة إيجابية اتبخت في وشي اتطمنت، في ناس من أهل تونس لاموا عليا إني مشيت بدري، ومكنتش مصدقة إن اللي اتعاقدت عليه في العقد نفذته.

شيرين عبد الوهاب: طارق مدكور علمني الطبخ

وقالت شيرين عبد الوهاب في صاحبة السعادة: اللي علمني الطبخ طارق مدكور وعلمني ازاي امتى اغني اوي وامتى مغنيش اوي.

وصرحت شيرين عبد الوهاب أنها أفضل من أنغام وسميرة سعيد في الطبخ، قائلة: سميرة سعيد مبتدخلش المطبخ زيها زي أنغام، احنا بنحب ناكل لكن مبنعرفش نطبخ وأنا اكتر واحدة فيهم بتعرف تطبخ.

شيرين عبد الوهاب عن طارق مدكور: علمني ازاي اعيش

وتطرقت شيرين عبد الوهاب في حديثها عن طارق مدكور، قائلة: طارق علمني ازاي اعيش صح ومبقاش فريسة لناس عاملة نفسها داخلة تساعد، وفتح عيني على حاجات كتير مكنتش واخدة بالي منها، طارق مسالم أوي والإنسان اللي بينجح أوي مينفعش يبقى مسالم، وأنا مبحبش أمشي جنب الحيط.

شيرين عبد الوهاب: بلوم على طارق مدكور لهذا السبب

وعن بداية معرفتها بطارق مدكور، قالت: وأنا عندي 17 سنة تأثيره بدأ عليا، وكان متدخل في كل حاجة بس بحب، وده بيحسسني أوي بالأمان، وهو طول عمره موجود بس بعيد، وكان ناشف عليا في مرحلة خلتني بعدت عنه واتعلمت من الدنيا بقى.

وأضافت شيرين: قالي خليكي مرنة ومتغنيش بالاوبرا استايل، عشان وانا صغيرة كنت بغني على روحي، وبلوم عليه لأن الفترة اللي بعدت فيها عنه اتعلمت فيها حاجات رديئة كان هو ممكن يصححهالي وأنا عايشاها دلوقتي اهو.