"مراتي طلبت مني 50 ألف جنية عشان تجيب دهب وتغيظ أختها " اعرف قصة أبراهيم من البداية

" مراتي بتغير من أختها وعايزة تخلص كل الفلوس اللي معايا عشان تبقي زيها " بتلك الكلمات روي أبراهيم لتحيا مصر من أمام محكمة الأسرة عن زوجته التي ترغب في تقليد شقيقتها التؤام في كل شئ وجاء ذلك علي حساب زوجها ذو الوضع المادي البسيط .

مراتي وأختها توأم 

بدأ أبراهيم حديثه لتحيا مصر:" أنا ومراتي لسة عرسان جداد ولما كنت طالب أيديها كنت عارف أنها ليها أختها التؤام وكنت فاكر أنهم هيكونوا مقربين من بعض بس اللي أتضحلي بعد كدة عكس كدة تماما لاحظت وقتها أن مراتي كانت مستعجلة علي الجوازة بشكل غريب عشان أختها التؤام أتجوزت وهي عايزة تحصلها كانت طلباتها كتير أيام الخطوبة زي أنها كانت عايزاني أجيبلها لبس وهدايا وأخرجها في أغلي الأماكن زي أختها المتجوزة بالظبط وأن كمان قاعة الفرح تكون أكبر وأفخم من القاعة اللي أتجوزت فيها اختها وأنا كل ده كنت بوافق عليه عشان كنت بحبها ومتمسك بيها وكان عندي أمل أن كل ده يتغير بعد الجواز لما حياتها تستقل ويبقي ليها بيتها وحياتها الخاصة بيها".

بعد الجواز كنت حاسس أن مراتي عايز تتقمص شخصية أختها في كل حاجة 

وتابع :" بعد الجواز اللي كنت خايف منه حصل وطبع مراتي وغيرتها من أختها اللي كنت فاكر أنهم هيقلوا بعد الجواز زادوا الضعف بدأت مراتي تجيب كل حاجة في شقتنا زي ما بتشوفها عند شقة أختها بالظبط ولو أختها حملت ألاقيها جاية بتقولي  أنا عايزة اخلف عشان أبن أختي ميبقاش أكبر من أبني في العمر بسنين كتيرة ولو جوز اختها أشترالها حاجة غالية ألاقيها بتتخانق معايا عشان أجيبلها نفس الحاجة كل ده وأنا ساكت ومستحمل لحد ما جت وطلبت مني اللي مكنتش متوقعه ".

مراتي طلبت مني 50 ألف عشان سبب تافه وهي عارفة أني ظروفي علي قدي 

وأختتم :" مراتي جت في يوم ولقيتها بتطلب مني 50 ألف جنية عشان تجيب بيهم دهب ولما سألتها لية وأية المناسبة لطلب زي ده ؟ قالتلي " انا كنت بزور أختي أنهاردة الصبح ولقيت جوزها جايبلها طقم دهب غالي جدا من العيار تقيل وانا مش أقل منها في حاجة وعايزة زيها " أتصدمت من كلامها وخصوصا أنها عارفة أني شغلي بسيط وأمكانياتي محدودة ومع ذلك بتطلب مني طلب خارج مقدرتي المادية  فبالتالي رفضت ولما هي سمعت أني مش موافق بدأت تقول كلام يجرحني ومراعيتش مشاعري فيه قالتلي " أن دي غلطتي من البداية أني اتجوزت واحد زيك يادوب يأكلني ويشربني لكن ميعيشنين عيشة مرتاحة زي اللي اختي عايشاها " ومن وقتها وأنا رامي عليها الطلاق وماشيين في الأوراق عشان انا مش هقدر أكمل حياتي مع واحدة حاسس أنها ملهاش شخصية ومش راضية بيا ولا بظروفي ".