مأساة هويدا : حملت في طفل معاق ولما جوزي شافه رماني في الشارع

" كنت مستنية اللحظة اللي هعيش فيها مع جوزي ومعانا أبننا ومكنتش أتوقع أنه هيعمل فيا كدة في يوم من الأيام" بتلك الكلمات روت هويدا لتحيا مصر أمام محكمة الأسرة عن زوجها الذي غدر بها وتخلي عنها وعن أبنه الرضيع لمجرد أنه ولد بإعاقة خلقية في وجهه .

كنت حامل وجوزي كان مستني المولود بفارغ الصبر  
 

بدأت هويدا حديثها لتحيا مصر :"أنا وجوزي كنا لسة عرسان جداد وبعد شهر من فرحنا حملت وجوزي كان طاير من الفرح لما عرف الخبر ده فضل طول شهور الحمل كان مدلعني و مهنيني وبيجيبلي كل اللي نفسي فيه ووعدني وعود كتير تفرح أي ست زي أنه بعد ما أجيبله الولد هيسفرنا بلاد برة و  هيدخله أحسن مدارس وهيلبسه أحسن لبس لأن جوزي وضعه المادي مستريح جدا وكانت شهور الحمل دي أجمل أيام حياتي كلها ومكنتش أتوقع أبدا أني هعيش بعدها في عذاب بقية عمري ".

صحيت من البنج بعد الولادة ولقيت جوزي مش جنبي 
 

وتابعت هويدا :" يوم ولادتي كنت متبنجة في المستشفي والدكتور قالي أني هولد قيصري كان معايا جوزي وووالدتي وحمايا ولدت وطلعوا أبني من بطني ولما فوقت من البنج ملقيتش حد معايا في المستشفي غير والدتي وكان أبني في حضنها وبتعيط بصيت عليه ولقيت أنه وشه فيه أعاقة خلقية خدته في حضني وبكيت ولما سألت والدتي علي جوزي وحمايا راحوا فين قالتلي " أول ما هنرجع البيت هشرحلك كل حاجة " .

لم هدومي ورماني في الشارع ومش راضي يثبت نسب أبنه 
 

وأضافت :" بعد ما طلعنا من المستشفي والدتي جت معايا بيتي وكانت طول الطريق مش راضية تفهمني جوزي وحمايا سابوني لية اول ما دخلت البيت لقيت جوزي لامم هدومي وحاططها في شنطة عند الباب سألته أية ده وأزاي يسيبني أنا وأبنه في يوم زي ده ؟ قالي " أنتي جايبالي عيل معاق و عايزاني أقول عليه أبني ... هدومك أهي وورقة طلاقك هتجيلك لحد عندك "  حمايا كان قاعد ساكت ومش بيتكلم ولا فكر يحل المشكلة فضلت أصرخ وأبكي وقولتله " حرام عليك ترميني في يوم زي ده عشان سبب أنا مليش ذنب فيه " لكنه مسمعنيش ووالدتي قالتلي " يلا يا بنتي متذليش نفسك لحد دول مش رجالة وانا غلطانة أني جوزتك لواحد معندوش قلب وحقك منهم هيجيلك بالقانون ".

حياتي وقفت وقلبي أتكسر 
 

وأختتمت :" انا حياتي وقفت وبقيت عايشة من غير روح أبني في نظري هيفضل أحسن واحد في الدنيا ومش متخيلة أني هعيش عمري كله أربيه لوحدي من غير أبوه اللي كنت فكراه هيبقي ضهري وسندي من يومها وانا في المحاكم بعد ما جوزي بعتلي ورقة طلاقي ومش راضي يعترف بنسب أبنه ولا حتي يسأل عليه وعليا لكن أنا رفعت عليه دعوي وأملي في ربنا وفي  القانون كبير أنه يجيبلي حقي ويطفي نار قلبي ".