السيناريست وليد يوسف: مسلسل الزيبق كان طلب من المخابرات المصرية.. واتفرجت على رأفت الهجان وقتها لهذا السبب | خاص

كشف السيناريست وليد يوسف عن تفاصيل بداية تكوين مسلسل “الزيبق” بطولة كريم عبد العزيز، وعن كيفية استعداده لتقديم عمل يناسب تاريخ جهاز المخابرات العامة المصرية.

وقال السيناريست وليد يوسف في تصريحات خاصة لـ تحيا مصر: جهاز المخابرات العامة المصرية كلم النجم الكبير وصديق عمري كريم عبد العزيز قالوله عايزين تقدم حدوتة من حواديت رجال المخابرات، عشان هو قريب لكل الناس، والناس كلها بتحبه وبتثق في تاريخه الفني ادوله 3 ملفات يختار منهم.

وتابع السيناريست: كريم قالهم أنا بحب اشتغل مع المخرج وائل عبد الله، ووائل قالهم أنا بحب اشتغل مع السيناريست وليد يوسف، وقبلها بسنة قدمنا وش تاني بالتعاون بينا احنا التلاتة، وقبلها بـ 22 سنة قدمنا سوا “ليه خلتني أحبك” أول بطولة للفنان كريم عبد العزيز.

السيناريست وليد يوسف: البطل الحقيقي موجود على قيد الحياة

وأردف وليد يوسف: هما ساعتها اختاروا ملف الزيبق وعرضوه عليا، البطل ده موجود وعلى قيد الحياة ومكنش متاح لينا إننا نصور معاه وجهًا لوجه وأغلب الناس بحكم سنها محضرتش الخمسينات والستينات والسبيعنات اللي كانت بتتكلم عن دموع في عيون وقحة، ورأفت الهجان.

وعن تفاصيل المسلسل قال: الحدوتة بتاعتنا بدأت 1989 وانتهت في 2003 بما إن في موبايلات وجوجل ووسائل مختلفة، ولغة حوار مختلفة تناسب العصر الجديد عن طريق الموبايل يخش على أي منصة يشوف اللي بيحصل دلوقتي.

وأضاف وليد يوسف لـ تحيا مصر: التحدي الكبير إننا كان نفسنا نكسب فئة الشباب اللي اتربوا على رأفت الهجان وجمعة الشوان

استعداد وليد منصور لـ مسلسل الزيبق

أما عن كيفية استعداد السيناريست لمسلسل الزيبق، قال لـ تحيا مصر: بعد ما خدت الملف وقريته اتفقنا نتقابل كمان اسبوع وبعدين اتفاجأت ان وائل عبد الله عمل كده، واتفرجت على رأفت الهجان الثلاث أجزاء، عشان حاجتين وهما الاختلاف، واني اراعي الألفية الجديدة من تكنولوجيا واللبس والسفر كان ازاي وكل التفاصيل الصغيرة دي لأن في ناس مهمتها تصطاد الحاجات الصغيرة دي وتعمل عليها كوميكس.