ريهام عبد الغفور: بحاول أسيب سيرة كويسة.. وفيه أصدقاء كتير ليا خذلوني

أكدت الفنانة ريهام عبد الغفور على أنها تود أن تترك سيرة حسنة لها وسط زملائها في الوسط الفني ووسط عائلتها أيضًا، حيث قالت في حوارها اليوم ببرنامج "AB Talks": "مفيش حاجة بتبقى غير السيرة وانك دايما تحاول تبقى فعلا سايب اثر كويس عند كل اللي حواليك سواء في الشغل وفي الحياة كأم كزوجة كبنت".

تحيا مصر يرصد تفاصيل تصريحات ريهام عبد الغفور في برنامج AB Talks

وتابعت ريهام عبد الغفور قائلة: "هو دا اللي فعلا بيدوم، وهو دا اللي شغالني اني اسيب حاجة كويسة لابويا ولابني ومبقاش خذلت ابويا في حياته لان الناس تتكلم عليا بشكل كويس كبني ادمة.. ابني يوسف لانه بيدرس سينما دلوقتي يمكن يشتغل فيها ويمكن لا الله اعلم بس دايما حاطة في دماغي يارب لما يجيي ويشتغل يسمع عني كلام كويس او الناس تبقى بتقول عليا كلام كويس".

أحوال العام الحالي مع ريهام عبد الغفور

ومن ناحية أخرى، كشفت ريهام عبد الغفور أن العام حالي كان جيدًا على المستوى المهني معها ولكنه كان سيئًا على مستوى حياتها الاجتماعية، حيث قالت عبد الغفور: "السنادي كانت حلوة أوي في الشغل بس في الحياة الاجتماعية حصل حاجات كتير تلغبط، زي أن ناس كتير مبقوش موجودين أصدقاء لأسباب مختلفة، وناس كتير خذلوني من أصدقائي مش على مستوى العيلة، واكتشفت أنه مش كل حد تديله حقيقتك".

واستطردت: "وأنا من الناس اللي بدي مشاعر كتير للي قدامي ولما بحب بحب للأخر أوي وبردو كل التوقعات عندي بتبقى للاخر اوي والسنادي اتعلمت أني أقلل التوقعات.. السنادي أنا في نعمة كبيرة على مستوى الشغل بس يمكن أنا سنة 2022 دي اديت كتير في الشغل ولغبطت كتير في السوشيال لايف يعني أنا عندي حاجات عديت بيها في السوشيال لايف مكانتش أسها حاجة".

ريهام عبد الغفور مع أنس بوخش

وتابعت الفنانة ريهام عبد الغفور حديثها عن أحوالها في العام الحالي، قائلة: "أنا ليا صديقة عزيزة بحبها أوي وبحترمها جدًا عندها تاتو كاتب كل حال يزول، أنا بالظبط دا اللي بيمثل الحالة الذهنية بتاعتي سنة 2022 لأن كل حال يزول، والسنادي مهمة اوي في حياتي بالنسبة للشغل وربنا نجحني ونصفني في حاجات كتير والحمد لله في العموم أنا في نعمة لكن أنا السنادي بردو حسيت أوي برعب تقلب الأحوال ورعب أن مفيش حاجة دايمة".