"مكنتش بحب بابا وأنا صغيرة وجوزي خاني في بيتي".. دوللي شاهين تروي صعوبتها خلال برنامج البخت

حلت الفنانة والمطربة دوللي، ضيفة على برنامج “البخت”، المذاع على قناة الشمس، والتي كشفت عن أسرار وصعوبات واجهتها أول مرة من قبل والدها وزوجها، ويرصد تحيا مصر أبرز تلك التصريحات في ذلك التقرير.

دوللي شاهين: سمعت جوزي بيتكلم مع واحدة وشوفت حاجات نسائية في غرفتي

تحدثت دوللي شاهين عن خاينة زوجها لها، فقالت: "أول مرة في أول زواج ليا كنت راجعة من السفر ولما دخلت البيت حصل ارتباك في البيت، ودخلت غرفتي عشان أوضب حاجتي فسمعت جوزي بيتكلم مع واحدة، وبيقولها: أسف مش هعرف أقابلك علشان زوجتي جت دلوقتي بشكل مفاجئ.

وأضافت: كنت راجعة من السفر ودخلت غرفة نومي في بيتي فلقيت حاجات نسائية  فعرفت أنه بيخوني وانفصلنا بصمت  وبهدوء لأنه كان موضوع منتهي من قبلها بالنسبالي.

دوللي شاهين: جوزي السابق كان واخد من واحدة فلوس وجت تطالبني بيها

وأضافت: “مكنش ليا رد فعل وقتها، وبعدها كلمتني الست اللي كان بيتكلم معاها جوزي وطلبت انها تقابلني وقالتلي إن جوزي أخد منها فلوس هي عايزة الفلوس اللي خدها فطلبت منها تيجي تصور فيديو كليب كنت شغالة عليه عشان هي كانت ماكيير، فقولتلها تشتغل مقابل أجرها ووافقت عشان مكنش ليا علاقة بجوزي وقتها”.

دوللي شاهين: مكنتش بحب أبويا ومن 3 سنين كنت بتربى كولد

وكشفت دوللي شاهين خلال البرنامج أيضا، صراعاتها مع والدها، فقالت: “ماكنتش بحب بابا وأنا صغيرة، وده اللي خلاني عايزة أتجوز وأخرج من البيت، وخلى عندي كمية غضب كبيرة كنت ساعات بطلعها على إخواتي، ومن أول سن 3 سنين ابتديت اتربى كولد، وشعري يتقص قصير وألبس لبس صبيان، ولحد سن 12 سنة كنت ابن شارع جدا، أضرب العيال، ولو حد ضرب أخويا أنا اللي انضرب في البيت عشان مدافعتش عنه”.

دوللي شاهين: بابا مكنش بيحب البنات وكان بيسجني في أوضتي

وتابعت دوللي شاهين حديثها عن والدها، وقسوته: “مكانش بيحب البنات، ولما ابتديت أحس إني بنت وابتدى يتقدملي عرسان وأنا طفلة عمرها 12 سنة حصلت له صدمة، وابتديت أتسجن في أوضتي وممنوع أخرج منها ولا أشوف حد ولا آكل مع عيلتي، وبدأت أدخل خلافات مع بابا طول الوقت وأثور على الواقع”.

واستكملت: ""بابا مكانش موافق إني أمثل، وطبعا أول أفلامي ويجا مفرجتوش عليه لغاية ما توفى، وقبل وفاته بشهور عملت مونتاج للفيلم وفرجته على نسخة معدلة من غير البوسة".