كدبت عشان أخد دوري في موسى واتسميت خطافة الرجالة لهذا السبب.. تصريحات جلا هشام

حلت الفنانة جلا هشام ضيفة فقرة من فقرات حلقة إسعاد يونس اليوم، التي وصفتها بالتلقائية والمترددة، وبدأت جلا كمذيعة برامج وبعدها دخلت عالم الفن.

تحيا مصر يرصد لكم تصريحات جلا هشام مع إسعاد يونس في صاحبة السعادة

بداية جلا هشام الفنية

تحدثت جلا هشام عن أول أدوارها خلال فقرتها مع صاحبة السعادة، قائلة: أول اوديشن عملته في نجيب زاهي زركش، وبعدين موسى.

وعن مشاركتها في مسلسل موسى، قالت: كدبت عشان اخد مسلسل موسى ده وقالولي بتتكلمي فرينش، قولتلهم احسن من العربي، وماشية بمبدأ حزلقوم “مش يمكن لما اخش ابقى بعرف؟” وكنت خايفة حد يخليني اترجم كل المسلسل لفرنساوي.

جلا هشام: اتسميت خطافة الرجالة بسبب مسلسل خلي بالك من زيزي

وعن مشاركتها في مسلسل خلي بالك من زيزي، قالت: تالت مسلسل كان خلي بالك من زيزي، وعملت الاوديشن مع علي قاسم.

وعن سبب تسميتها بخطافة الرجالة قالت: اتسميت بخطافة الرجالة عشان مسلسل خلي بالك من زيزي، ومن بعدها اي حاجة بدور أي واحدة مكروهه بقيت اترشح فيها.

جلا هشام عن مشاركتها في نجيب زاهي زركش

أما عن مشاركتها في مسلسل نجيب زاهي زركش، قالت: أكتر مشهد بحبه في نجيب زاهي زركش كان مع أنوشكا، وكان أخف مسلسل في الدنيا وبروح أضحك.

وعن أصعب الأدوار التي قامت بها، قالت: كان في مسلسل راجعين يا هوا كان أصعب حاجة عملتها في مشهدي مع جوزي وقتها، وقعدت اعيط ساعة متواصلة بسببه، وقعدوا يستفزوني قبل المشهد عشان اطلع حاجة حقيقيه.

وعن طموحاتها، قالت: عايزة اخد ورش ونفسي ابقى حاسه اني اتطور ومش عايزة اقع في فخ اني اخد كل حاجة وعايزة انقي أدواري.