مراته قالتله أتجوز براحتك وبعدها خلصت عليه..شقيقة صيدلي حلوان تكشف التفاصيل الأخيرة قبل وفاته

"لما أستنجد بيا من البلطجية اللي كانوا عنده في الشقة بسألوا مراتك فين من ده كله قالي" غدرت بيا"..روت شقيقة صيدلي حلوان لتحيا مصر في بث مباشر عن غدر زوجة شقيقها الأولي والتهديدات التي تلقاها من حماه قبل وفاته. 

كانت بتتحايل عليا أنا ووالدتي اننا نصالحها علي أخويا 

بدأت شقيقة صيدلي حلوان حديثها:"أخويا الناس كلها بتحبه ودفنته كانت الناس كلها بتعيط عليه فيها أتعرف علي مراته الأولي في صيدلية عشان كانت شغالة مندوبة في الصيدليات و كانت بتتنقل هي وأهلها بين السعودية والقاهرة جه قالنا عليها ووالدتي زي أي أم كانت عايزة تجوزه وتفرح بيه وبالفعل روحنا وطلبنا أيديها وتم الزواج".

شقيق صيدلي حلوان:"أخويا كان عايز يفتح شركة أدوية وزوجته خلصت عليه"..فيديو

"عمو رمى بابا من البلكونة"..محامي صيدلي حلوان يكشف تفاصيل جديدة من داخل المحكمة..فيديو

أخويا طلقها مرتين وكانت بتتحايل علينا نصالحهم علي بعض 

وتابعت شقيقة صيدلي حلوان:"بعد الجواز خلفوا ولد وسموه "يونس" ومراته أتغيرت جدا بعد الجواز وكانت مهملة في كل حاجة حتي في الاكل والشرب وتربية أبنها أخويا فضل في كتير يحاول يتأقلم معاها لحد ما جاب أخره وطلقها وبعد ما طلقها هي ووالدتها كانوا بيتصلوا بينا عشان نرجعها وأخويا عشان حنين وقلبه طيب ومهانش عليه أنه يسيب أبنه ردها عشان "يونس" وعاشوا مع بعض تاني وهي في الوقت ده كانت بتحاول تثبت أنها أتغيرت عن الأول عشان ميسيبهاش تاني لكن أتغيرت شوية ورجعت لطباعها تاني وساعتها اتطلقوا للمرة التانية".

قالتله أتجوز بس متسيبنيش أنا وأبنك 

وأضافت:"بعد ما أخويا طلقها المرة التانية عشان ملقاش فيها أمل قالتله ردني تاني ولو عايو تتجوز أنا موافقة بس متسيبنيش انا وأبنك عشان أنا مش بعرف أعمل حاجة في حياتي من غيرك وبالفعل في الوقت ده أخويا وافق علي كلامها وشوفناله عروسة كويسة ووافقت علي ظروفه وأتجوزها بعد ما رد مراته الأولي  لكن في الوقت ده أخويا أتفاجئ بمكالمة من حماة اللي هو والد مراته الأولي بيقوله فيها " أنا عرفت انك أتجوزت علي بنتي وأنا هجيب حقها منك " ولما جه حكالنا سألناه " هي مش مراتك عارفة أنك اتجوزت ؟" قالنا " هي عارفة لكن أهلها لا " .

أخويا كان بيستجد بيا وبيبعتلنا اللوكيشن عشان نروح لأخر لحظة 

وأختتمت:"أخويا بعد مكالمة حماة دي قالنا أنا هنزل من السعودية وأروحله  القاهرة وأتفاهم معاه ولما قولناله لا بلاش ومتجيش قالنا "متخافوش أنا عارف أية اللي مستنيني هناك ومش خايف وبالفعل رجع من السعودية ولما راح لحماه نهايته كانت علي أيده دخل الشقة ملقاش مراته ولقي شوية بلطجية مضوه علي أيصالات أمانة وجابوله المأذون عشان يجبروه يطلق مراته التاني اخويا حاول يسايسهم عشان ميعملوش فيه حاجة ودخل البلكونة كلمني عشان نلحقه وبعتلي اللوكيشن ولما سألته"مراتك أزاي سايباك مع الناس دي ؟" قالنا " مراتي غدرت بيا " ياريتني قدرت ألحقه كان زمانه لسة عايش ووسطينا".

الأجهزة الأمنية

بداية الواقعة، عندما تلقت الأجهزة الأمنية بلاغاً يفيد بوقوع شخص من أعلى شرفة منزله في منطقة حلوان، على الفور انتقلت قوة أمنية إلي مكان البلاغ وتبين، قيام زوجة المجني عليه بإعداد كمين له داخل الشقة، وإجباره على توقيع إيصالات أمانة.

وكشفت الحريات، أن المجني عليه حاول مقاومتهم ولكن فشل، تحرر محضر بالواقعة وأخطرت النيابة العامة التي تولت التحقيق وأصدرت قرارها بحبس زوجة المجني عليه وأخرين.

كما جدد قاضي المعارضات اليوم حبسهم 15 يوماً على ذمة التحقيقات التي تجري معهم.